Gujarati News

મુંબઈ :આઈસીસી પ્લેયર ઓફ ધ મન્થ જાહેર થયા છે,આઈસીસીએ ડિસેમ્બર માટે સર્વશ્રેષ્ઠ ક્રિકેટરના નામાંકનની જાહેરાત કરી છે.  જેમાં ભારત, ઓસ્ટ્રેલિયા અને ન્યુઝીલેન્ડના એક-એક ખેલાડીનો સમાવેશ થાય છે. ત્રણ ખેલાડીઓને નોમિનેટ કર્યા છે.  જેમાં ભારતીય ક્રિકેટર મયંક અગ્રવાલનો પણ સમાવેશ થાય છે.  મયંકની સાથે જ આ યાદીમાં ન્યૂઝીલેન્ડના સ્પિનર એજાઝ પટેલનું નામ પણ સામેલ છે, જેણે મુંબઈ ટેસ્ટની એક ઇનિંગમાં ભારતની તમામ 10 વિકેટ લીધી હતી.  એશિઝમાં મજબૂત ઓલરાઉન્ડર પ્રદર્શન કરનાર મિચેલ સ્ટાર્ક પણ ડિસેમ્બર મહિનાનો સર્વશ્રેષ્ઠ ક્રિકેટર બનવાની રેસમાં છે.

 મયંક અગ્રવાલે ડિસેમ્બરમાં બે ટેસ્ટ મેચ રમી હતી.  જેમાં તેણે 69 રનની એવરેજથી 276 રન બનાવ્યા હતા.  ન્યુઝીલેન્ડ સામે કાનપુર ટેસ્ટ ડ્રો થયા બાદ ટીમ ઈન્ડિયાને સીરીઝ જીતવા માટે મુંબઈ ટેસ્ટ જીતવી જરૂરી હતી.  મયંક અગ્રવાલે ભારતને આ જીત અપાવી હતી.  તેણે મુંબઈ ટેસ્ટની બંને ઇનિંગ્સમાં 150 અને 62 રન બનાવ્યા હતા.
 આ પછી તેણે સેન્ચુરિયનમાં દક્ષિણ આફ્રિકા સામેની ઐતિહાસિક જીતમાં પણ મહત્વની ભૂમિકા ભજવી હતી.  સેન્ચુરિયન ટેસ્ટમાં મયંકે કેએલ રાહુલ સાથે 117 રનની ભાગીદારી કરી હતી.  આ ભાગીદારીની મદદથી ભારતે પ્રથમ દાવમાં 327 રન બનાવ્યા હતા.  બોલરની મદદગાર વિકેટ પર ભારતનો પ્રથમ દાવનો સ્કોર ટીમની ઐતિહાસિક જીતનું કારણ બન્યો હતો.
એજાઝ પટેલે માત્ર એક જ ટેસ્ટ રમીને નોમિનેશન મેળવ્યું હતું
 ન્યુઝીલેન્ડના સ્પિનર એજાઝ પટેલે ડિસેમ્બર મહિનામાં માત્ર એક જ ટેસ્ટ મેચ રમી હતી.  પરંતુ આ ટેસ્ટમાં તેણે ઐતિહાસિક રેકોર્ડ બનાવ્યો હતો.  તેણે મુંબઈ ટેસ્ટમાં ભારત વિરુદ્ધ પ્રથમ દાવમાં તમામ 10 વિકેટ ઝડપી હતી.  આવું કરનાર તે વિશ્વનો ત્રીજો ખેલાડી બન્યો.  તેના પહેલા માત્ર અનિલ કુંબલે અને જિમ લેકરે આ કારનામું કર્યું હતું.  ભારતની બીજી ઇનિંગમાં પણ આ સ્પિનરે 4 વિકેટ ઝડપી હતી.
મિશેલ સ્ટાર્કઃ બોલની સાથે સાથે બેટ પણ ઘણું રમ્યું
 મિચેલ સ્ટાર્કે પોતાના ઓલરાઉન્ડર પ્રદર્શનના આધારે ડિસેમ્બર મહિનાના સર્વશ્રેષ્ઠ ખેલાડીઓની રેસમાં પોતાનો સમાવેશ કર્યો હતો.  તેણે ડિસેમ્બરમાં ત્રણ એશિઝ મેચોમાં 19.64ની બોલિંગ એવરેજ સાથે 14 વિકેટ લીધી હતી.  આ સાથે તેણે 58.50ની એવરેજથી 117 રન પણ બનાવ્યા હતા.