Gujarati News

એકવીસમા ફૂટબોલ વર્લ્ડકપમાં અપસેટો વચ્ચે બેલ્જિયમ અને પાંચ વખતની ચેમ્પિયન બ્રાઝિલ આજે સેમી ફાઈનલમાં પહોંચવા માટે મેદાનમાં ઉતરશે. બેલ્જિયમે ગ્રુપ - રાઉન્ડની ત્રણે મેચ જીતીને બીજા રાઉન્ડમાં પ્રવેશ કર્યો હતો જયાં એણે બે ગોલથી પાછળ રહ્યા બાદ ગજબની હિંમત બતાવતા જાપાનને ૩-૨થી હરાવીને કવોર્ટર ફાઈનલમાં જગ્યા બનાવી હતી.

બેલ્જિયમ જો બ્રાઝિલને હરાવે તો ટુર્નામેન્ટના ઈતિહાસમાં એ બીજી વખત સેમી ફાઈનલમાં પહોંચશે. બેલ્જિયમ પહેલી વખત ૧૯૮૬માં મેકિસકોમાં યોજાયેલા વર્લ્ડકપમાં સેમી ફાઈનલમાં પહોંચ્યુ હતું. જેમાં આર્જેન્ટીનાએ એને ૦-૨થી હરાવ્યુ હતું.

૨૦૦૨ના વર્લ્ડકપમાં બ્રાઝિલે બેલ્જિયમને ૨-૦થી હરાવીને ટુર્નામેન્ટની બહાર કર્યુ હોવાથી બેલ્જિયમ પર આ મેચમાં મનોવૈજ્ઞાનિક દબાણ હશે. જેમાંથી એ બહાર આવવા માગશે. બેલ્જિયમે પ્રિ-કવાર્ટર ફાઈનલમાં જે રીતે જાપાનને  બે ગોલથી પાછળ રહ્યા બાદ હરાવ્યુ એ આશ્ચર્યજનક હતું. બેલ્જિયમે આ પ્રદર્શનથી દેખાડી દીધુ છે કે એ નેમાર એન્ડ કંપનીને જબરદસ્ત ટક્કર આપવા તૈયાર છે. બીજી તરફ, બ્રાઝિલ પણ ગ્રુપ રાઉન્ડમાં સાત પોઈન્ટ્સ સાથે પ્રિ-કવાર્ટર ફાઈનલમાં પહોંચ્યુ હતું અને કવોર્ટર ફાઈનલમાં પ્રવેશવા માટે એણે મેકિસકોને સહેલાઈથી ૨-૦થી હરાવ્યુ હતું.

વળી આ મેચમાં બ્રાઝિલના સ્ટાર ખેલાડી નેમારે પોતાની ક્ષમતાનું પ્રદર્શન કરતા તમામને જણાવી દીધુ હતું કે તે પોતાની ઈજાની સમસ્યાને ભુલાવી ચૂકયો છે. હવે જોવાનું એ છે કે બેલ્જિયમની ટીમ કઈ રીતે નેમારના આક્રમણને રોકી શકે છે.