Gujarati News

Gujarati News

News of Monday, 3rd February 2020

ક્રિકેટર હરભજનસિંહ ફિલ્મ ક્ષેત્રે પર્દાપણ કરશેઃ ફિલ્મ ફ્રેન્ડશિપમાં ભારતીય ક્રિકેટર મુખ્ય ભૂમિકામાં ચમકશે

નવી દિલ્હીઃ ભારતીય ક્રિકેટ ટીમના પૂર્વ બોલર હરભજન સિંહ પોતાની રમતથી લોકો વચ્ચે ખુબ લોકપ્રિય રહ્યો છે. હવે તે સિલ્વર સ્ક્રીન પર પોતાનો જલવો દેખાડશે. હરભજન સિંહ ફિલ્મ 'ફ્રેન્ડશિપ'થી અભિનયમાં પર્દાપણ કરવા માટે તૈયાર છે. ભારતીય સિનેમામાં આ પ્રથમ વખત થશે, જ્યારે કોઈ ફિલ્મમાં ભારતીય ક્રિકેટ મુખ્ય ભૂમિકામાં હશે. ફિલ્મ મેકર્સે સોશિયલ મીડિયા પર તેની જાહેરાત કરી છે.

મેકર્સે ફિલ્મનું પોસ્ટ કર્યું રિલીઝ

મેકર્સે ટ્વીટર પર ફિલ્મનું ફર્સ્ટ લુક પોસ્ટર શેર કર્યું છે. પોસ્ટરની સાથે લખ્યું, 'ભારતીય સિનેમામાં પહેલી વાર. ભારતીય ક્રિકેટર હરભજન સિંહ અપકમિંગ ફિલ્મ 'ફ્રેન્ડશિપ'માં લીડ રોલ પ્લે કરશે.' આ ફિલ્મના પોસ્ટરમાં કોઈનો ચહેરો તો દેખાઈ રહ્યો નથી પરંતુ તેમાં હાથકડી લાગેલા બે હાથ અને ક્રિકેટનું ખાલી મેદાન જોવા મળી રહ્યું છે.

હરભજને શેર કર્યું પોસ્ટર

મહત્વનું છે કે ફિલ્મ ફ્રેન્ડશિપના પોસ્ટરને હરભજન સિંહે પણ પોતાના ટ્વીટર હેન્ડલ પર શેર કર્યું છે. આ ફિલ્મના ડાયરેક્ટર જેપીઆર અને શામ સૂર્યા છે. તો જેપીઆર અને સ્ટાલિને ફિલ્મને પ્રોડ્યૂસ કરી છે.

હરભજન સિંહનું આંતરરાષ્ટ્રીય ક્રિકેટ કરિયર

હરભજન સિંહના આંતરરાષ્ટ્રીય ક્રિકેટ કરિયરની વાત કરવામાં આવે તો તેણે 103 ટેસ્ટ મેચોમાં 417 વિકેટ, 236 વનડે મેચોમાં 269 વિકેટ અને 28 ટી20 મેચોમાં 25 વિકેટ ઝડપી છે. હરભજન સિંહ છેલ્લે 3 માર્ચ 2016ના ક્રિકેટના મેદાન પર ટી20 મેચ રમતો જોવા મળ્યો હતો.

(4:56 pm IST)