જસદણના જસાપરમાં ઝેર પી લેનારા દિનેશ માવીએ દમ તોડ્યો

વતનમાંથી છોકરી ભગાડી લાવ્યો'તો તેને તેનો પરિવાર પરત લઇ જતાં પગલુ ભર્યાની શકયતા

રાજકોટ તા. ૨૮: પડધરીમાં દેવકરણભાઇની વાડીમાં પરિવાર સાથે રહેતાં મુળ એમપીના દિનેશ વિરૂભાઇ માવી (ઉ.વ.૨૨) નામના યુવાને જસદણના જસાપરમાં પોતાના મામા જ્યાં મજૂરી કરે છે એ વાડીએ ૨૫મીએ રાત્રે ઝેરી દવા પી લેતાં સારવાર માટે રાજકોટ સિવિલમાં ખસેડાયો હતો. પરંતુ અહિ આજે દમ તોડી દેતાં પરિવારમાં શોક છવાઇ ગયો હતો.

આપઘાત કરનાર છ ભાઇમાં વચેટ હતો. હોસ્પિટલ ચોકીના રણછોડભાઇએ આટકોટ પોલીસને જાણ કરી હતી. પિતા વીરૂભાઇના કહેવા મુજબ દિનેશ વતનમાંથી એક છોકરીને ભગાડી લાવ્યો હતો. આ છોકરીને તેના પરિવારજનો પાછી તેડી ગયા હતાં. ત્યારથી તે દુઃખી રહેતો હતો.  કદાચ આ કારણે પગલુ ભર્યાની શંકા છે. આટકોટ પોલીસ વધુ તપાસ કરે છે.