જુનાગઢ-મજેવડીમાંથી ૨ યુવતિઓ લાપતા

જુનાગઢ, તા.૨૦: જુનાગઢ તાલુકાનાં મજેવડી ગામે રહેતા હરીભાઇ ભુરાભાઇ પોંકીયાની ૧પ વર્ષની પુત્રી રવીના તા.૧૪ સપ્ટેમ્બરથી ઘરેથી કોઇને કહ્યા વિના કયાંક જતા રહ્યા છે. રવિના ગુમ થયા તે દિવસે તેણીએ ડ્રેસ પહેરેલ હતો, ચહેરો ગોળ, ૧પપ સે.મી ઉંચાઇ, પાતળા બાંધાનાં ઘઉંવર્ણ વાળ, આંખે કાળો રંગ ધરાવતા રવિનાબેન ગુમ થયા તે અંગે હરીભાઇ ભુરાભાઇ પોંકીયાએ તાલુકા પોલીસ મથકે જાણ કરેલ છે. આ કામની તપાસ સર્કલ પોલીસ ઇન્સપેકટર આર.બી.સોલંકી ચલાવી રહ્યા છે. જો કોઇને હરીભાઇ પોંકીયાની દીકરી રવીનાબેનની ભાળ મળે તો નજીકનાં પોલીસ મથકે જાણ કરવા એમ.ઓ.બી. શાખાનાં પોલીસ સબ ઇન્સ્પેકટરની યાદીમાં જણાવાયુ છે.

જુનાગઢ શહેરનાં રાજીવનગર ખાતે રહેતા રાજાભાઇ સકરાભાઇ મહિડાની ૨૧ વર્ષની ઉંમરની દિકરી લક્ષ્મીબેન તા.૧૪મી સપ્ટેમ્બરે શાળાએ પેપર આપ્યા બાદ ગુમ થયા છે. લક્ષ્મીબેન વાને ઘઉંવર્ણા, વાળ અને આંખનો રંગ કાળો, ગુમ થયા ત્યારે સ્કુલ ડ્રેસ પહેરેલ હતો, ગુજરાત-અંગ્રેજી અને હિન્દી ભાષા જાણે છે. રાજાભાઇ મહિડાએ જૂનાગઢ સી.ડીવીઝનમાં ગુમ થયા અંગે ફરિયાદ નોંધાવેલ છે. આ કામની તપાસ એન.એમ.કટારા એ.એસ.આઇ. ચલાવી રહ્યા છે. જો કોઇને લક્ષ્મીબેનની ભાળ મળે તો નજીકનાં પોલીસ મથકે જાણ કરવા એમ.ઓ.બી. શાખાનાં પોલીસ સબ ઇન્સ્પેકટર બી.એમ.વાઘમશીની યાદીમાં જણાવાયુ છે.