ભાવનગરના સોનગઢમાં રામજી કોળીની હત્યા

અજાણ્યા શખ્સોએ રસ્તા વચ્ચે આંતરીને હથિયારોના ઘા ઝીંકીને ફરાર

ભાવનગર પંથકનાં હિરાઘસુ યુવાનની કરપીણ હત્યા કરી આરોપીઓ નાસી છુટયા હતા. (તસ્વીરઃ મેઘના વિપુલ હિરાણી-ભાવનગર)

ભાવનગર તા. ૧રઃ ભાવનગરનાં સોનગઢ ગામનાં હિરાઘસુ કોળી યુવાનની માથાનાં ભાગે તીક્ષ્ણ હથિયારનાં ઘા ઝીંકી કરપીણ હત્યા કરાયાનો બનાવ બનવા પામ્યો છે.

ભાવનગરનાં સિહોર પાસેનાં સોનગઢ ગામે રહેતાં અને હિરાના કારખાનામાં કામ કરતાં રત્ન કલાકાર યુવાન કોળી રામજીભાઇ છનાભાઇ કંટારીયા (ઉ.વ. ર૮) સિહોરમાં રીલાયન્સ પેટ્રોલ પંપ પાસે આવેલા હિરાનાં કારખાનામાં કામ કરી પોતાનું બાઇક નં. જીજે ૪ બીડી ૯૯૪૬ લઇને સોનગઢ પોતાનાં ગામે જઇ રહ્યો હતો ત્યારે મોટાસુરકા ગામ નજીક અજાણ્યા શખ્સોએ તેને રસ્તા વચ્ચે આંતરી માથાનાં ભાગે તિક્ષ્ણ હથિયારોનાં ઘા ઝીંકી ઘાતકી હત્યા કરી નાસી છુટયા હતાં.

આ બનાવની જાણ થતાંજ સિહોર પોલીસનો સ્ટાફ બનાવ સ્થળે દોડી ગયો હતો અને તપાસ હાથ ધરી હતી. આ બનાવ અંગે મૃતક યુવાનના પિતરાઇભાઇ ઘનશ્યામભાઇ હરજીભાઇ કંટારીયાએ સોનગઢ પોલીસ સ્ટેશનમાં અજાણ્યા શખ્સો વિરૂધ્ધ ફરીયાદ નોંધાવતાં પોલીસે ગુન્હો નોંધી તપાસ હાથ ધરી છે.