કપડવંજ તાલુકામાં બે બાઈક સામ-સામે અથડાતા બને ચાલક મોતને ભેટ્યા

કપડવંજ:તાલુકાના ડોડીયા-વાસણા સીમમાં ગઈકાલે સવારે સામસામે બે મોટરસાઈકલ અથડાયા હતાં. આ ગમખ્વાર અકસ્માતમાં બંને વાહનચાલકોને ગંભીર ઈજા થતાં સારવાર દરમિયાન મોત નિપજ્યાં હતા. આ અંગે કપડવંજ રૂરલ પોલીસે કાર્યવાહી હાથ ધરી છે. 

આ અંગે મળતી માહિતી મુજબ બાયડ તાલુકાના કોઠડામાં રહેતાં રઈજીભાઈ ગાડાભાઈ વાઘરી પોતાની મોટરસાઈકલ નં જીજે ૦૯ સીએચ ૫૪૧૫ લઈને કપડવંજ તાલુકાના ડોડીયા-વાસણાં સીમમાંથી પસાર થતાં હતાં. તે વખતે સામેથી મોટરસાઈકલ નં જીજે ૦૭ બીઈ ૯૪૬૧ લઈને લાંભવેલના રાજેશભાઈ નરસિંહભાઈ રાવલ પુરપાટ આવતાં હોઈ તેમણે રઈજીભાઈની મોટરસાઈકલ સાથે પોતાની મોટરસાઈકલ અથડાવતાં અકસ્માત સર્જાયો હતો. 

આ અકસ્માતમાં બંને મોટરસાઈકલ ચાલકોને ગંભીર ઈજા થતાં તેમને સારવાર માટે દાખલ કર્યાં હતાં. જ્યાં તેમનું મોત નિપજ્યું હતું. આ બનાવ અંગે ગાડાભાઈ શંકરભાઈ વાઘરીની ફરિયાદને આધારે મોટરસાઈકલ નં જીજે ૦૭ બીઈ ૯૪૬૧ ના ચાલક સામે પોલીસે કાર્યવાહી હાથ ધરી છે.