Gujarati News

(મેઘના વિપુલ હિરાણી દ્વારા) ભાવનગર તા. ૩૦ : ભાવનગરના માલણકા ગામે રૂ. ૫૦ હજારની ઉઘરાણી બાબતે રત્ન કલાકાર આધેડ ઉપર બે શખ્સોએ છરીના ઘા ઝીંકી હત્યા કરી નાંખ્યાનો બનાવ બનવા પામ્યો છે.

ખૂનના આ બનાવની વિગતો એવી છે કે ભાવનગરના માલણકા ગામે રહેતા અને હિરાના કારખાનામાં કામ કરતા રમેશભાઇ મનજીભાઇ બારૈયા (ઉ.વ.૫૦) ઉપર આ જ ગામના નિલેશ ગીગાભાઇ બારૈયા અને નિતેશ ગીગાભાઇ બારૈયાએ છરી વડે હુમલો કરી તેની હત્યા કરી નાખી હતી. બનાવની જાણ થતાં જ વરતેજ પોલીસ સ્ટેશનના પી.આઇ. શ્રી સોલંકી તથા સ્ટાફ બનાવ સ્થળે દોડી ગયો હતો અને તપાસ હાથ ધરી હતી.

હત્યાના આ બનાવ અંગે મૃતક હિરાઘસુ રમેશભાઇનાં પુત્ર હિતેશ રમેશભાઇ બારૈયાએ વરતેજ પોલીસ સ્ટેશનમાં આ જ ગામના નિલેશ ગીગાભાઇ બારૈયા અને મિતેશ ગીગાભાઇ બારૈયા વિરૂધ્ધ એવા મતલબની ફરીયાદ નોંધાવી છે કે તેના પિતા મૃતક રમેશભાઇએ આરોપીના પિતાને રૂ. ૫૦ હજાર ઉછીના આપ્યા હતા અને આ રકમની તેઓએ ઉઘરાણી કરતા તેઓને નહિ ગમતા તેના પિતા ઉપર છરીનાં ઘા ઝીંકી હત્યા કરી હતી. આ અંગે પોલીસે ગુન્હો નોંધી આરોપીને ઝડપી લેવા તજવીજ હાથ ધરી છે.