Gujarati News

રાજકોટ, તા. ૨૩ : સુરેન્દ્રનગર અને જૂનાગઢ પંથકના કોંગ્રેસના મોટા માથાને ખેડવી લોકસભાની ચૂંટણી ટાણે જ કોંગ્રેસને મોટો ફટકો આપવાનો ભાજપનો પ્રયાસ હોવાના વાવડ મળે છે. લોકસભાની ચૂંટણીમાં ભાજપે આ બંને બેઠકોમાં કોળી ઉમેદવાર મૂકી જીત મેળવી હતી. આ વખતે પણ બંને બેઠકોમાં કોળી સમાજને ટીકીટ આપવાની ભાજપની ગણતરી છે.

જૂનાગઢ - વેરાવળ પંથકના કોંગ્રેસના અગ્રણી તરફ ભાજપની નજર ઠરી છે. સુરેન્દ્રનગર પંથક માટે પણ એવો જ પ્રયાસ છે. ભાજપે આકર્ષવા ધારેલા બંને કોળી આગેવાનો આકર્ષાઈ જાય તો લોકસભાની ટીકીટ આપવા સુધીની ગણતરી હોવાનું કહેવાય છે. કોંગ્રેસના ૪ ધારાસભ્યોએ રાજીનામા આપ્યા તે વખતથી આ બંનેનું નામ પક્ષપલ્ટાની સંભાવના બાબતે ઉછળી રહ્યું છે. જો ભાજપનું કથિત ઓપરેશન સફળ થશે તો સૌરાષ્ટ્રના રાજકારણમાં મોટો ભૂકંપ સર્જાશે.