Gujarati News

રાજકોટ, તા. ૨૩ :. વિંછીયાના બોટાદ રોડ પર પુત્ર સાથે લગ્ન કરવા માટે યુવતી અને તેના માતા-પિતાને દબાણ કરી કોળી શખ્સે યુવતી અને તેના માતા-પિતા સાથે ઝઘડો કરી આંખમાં ઝેરી દવા છાંટી દેતા ત્રણેયને સારવાર માટે રાજકોટ ખસેડાયા છે.

મળતી વિગત મુજબ વિંછીયાના બોટાદ રોડ પર રહેતા મુન્નાભાઈ મયુરભાઈ જતાપરા (ઉ.વ.૩૮), પત્ની કૈલાશબેન મુન્નાભાઈ જતાપરા (ઉ.વ. ૨૫) અને તેની પુત્રી હેતલ (ઉ.વ.૧૮) ગઈકાલે પોતાના ઘરે હતા ત્યારે વિંછીયાના કંધેવાડીયા ગામમા રહેતો ઘનશ્યામ કેશુ પડાણી નામનો કોળી શખ્સ ઘરે આવી ઝઘડો કરી યુવતી અને તેના માતા-પિતા ઉપર ઝેરી દવા છાંટી ભાગી ગયો હતો. બાદ ત્રણેયને આંખમાં અસર થતા સારવાર માટે સિવિલ હોસ્પીટલમાં ખસેડાયા હતા. આ બનાવમાં હોસ્પીટલના બીછાનેથી કૈલાશબેને જણાવ્યુ કે પતિ અને પુત્રી ત્રણેય ઘરે હતા ત્યારે ઘનશ્યામ પડાણી ઘરે આવી અને કહેલ કે 'મારા દીકરા પ્રકાશ સાથે તારી દીકરીના લગ્ન કરાવવા છે' તેમ કહેતા અમે લગ્નની ના પાડતા તે ઉશ્કેરાય જઈ ઝેરી દવા ત્રણેયના મોઢા ઉપર છાંટી દીધી હતી. આ બનાવ અંગે વિંછીયા પોલીસે તપાસ હાથ ધરી છે.