Gujarati News

Gujarati News

News of Tuesday, 28th June 2022

કચ્છના છેવાડાના તથા સરહદી ગામડા સુધીની આરોગ્ય સેવા પ્રસૂતા માતા માટે બની આર્શીવાદ રૂપ: ખાવડા સીએચસીમાં માતા અને નવજાત શિશુને મળ્યું નવજીવન

જોખમી સ્થિતીમાં ભુજ પહોંચી શકે એમ ન હોવાથી સામુહિક આરોગ્ય કેન્દ્રમાં જ NPM સ્ટાફે સુઝબુઝ વાપરીને નોર્મલ પ્રસૂતિ કરાવી

(વિનોદ ગાલા દ્વારા)ભુજ તા.૨૮

સરહદી તથા છેવાડાના વિસ્તારના લોકોને સમયસર આરોગ્યસેવા મળી શકે તે માટે રાજય સરકાર કટિબધ્ધ છે. આ સંકલ્પ હેઠળ સરકાર દ્વારા છેવાડાના વિસ્તારોમાં પ્રાથમિક આરોગ્ય કેન્દ્ર તથા સામુહિક આરોગ્ય કેન્દ્રની સુવિધા આપવા સાથે અધતન સાધનો તથા મેડીકલ સ્ટાફ મુકાયેલો છે. સરકારની આરોગ્ય સંબંધી આ ચિંતાના કારણે જ રાજયમાં માતા તથા શિશુ મૃત્યુ દરમાં નોંધપાત્ર ઘટાડો થયો છે. કચ્છમાં પણ સરહદી વિસ્તારની પ્રસુતા મહિલાઓને આરોગ્ય સેવાનો સીધો ફાયદો મળી રહ્યો છે. જે હેઠળ જ તાજેતરમાં ખાવડા સીએચસીમાં જોખમી સ્થિતિમાં પહોંચેલી મોટી રોહતડની પ્રસુતા માતા અને નવજાત શિશુ બંનેને સમયસર સારવાર મળી રહેતા જીવતદાન મળી શકયું હતું.

ગત તા.૨૫મીના મોટી રોહતડ ગામની ૨૪ વર્ષીય પ્રસુતા મહિલા સુવાવડના દુખાવા સાથે ખાવડા સામુહિક આરોગ્ય કેન્દ્ર પહોંચી હતી. આ સમયે મહિલાની તપાસ કરતા નવજાત બાળક અને મહિલાના જીવને જોખમ હોય તે સ્થિતિ જોવા મળી હતી. આ સ્થિતીમાં જો મહિલાને ભુજ રીફર કરાય તો રસ્તામાં જ પ્રસુતિ થઇ જાય અને બંનેના જીવ જોખમમાં મુકાઇ જાય તેવી સંભાવના હતી. તેથી ફરજ પર હાજર નર્સ પ્રેક્ટિશનર મીડવાઇફ સ્ટાફના રાજલ સિંગરખિયાએ પોતાની સ્કીલ અને સુઝબુઝથી પ્રસુતાને નોર્મલ ડીલીવરી કરાવીને માતા અને નવજાત શિશુ બંનેનો જીવ બચાવી લીધો હતો. હાલ માતા અને બાળક બંને સ્વસ્થ છે.

(9:50 am IST)