Gujarati News

ભુજ તા. ૨૬ : અજાણ્યા પ્રવાસન સ્થળોએ વાહન દ્વારા ફરવા જતા પ્રવાસીઓએ રસ્તાની જાણકારીના અભાવે સાવધાનીપૂર્વક વાહન ચલાવવું જોઇએ નહિ તો ઘણીવાર અણધાર્યા અકસ્માતનો ભોગ બનવું પડે છે.

અમદાવાદથી પોતાના સાત સોફટવેર એન્જીનિયર મિત્રો સાથે આવેલા મુળ જામનગરના યુવાન સોફટવેર એન્જીનિયરની બાઇક સ્લીપ થતાં તેનું ભીરેડીયારાથી સફેદરણ ધોરડો તરફ જતાં માર્ગ ઉપર જ અરેરાટીભર્યું મોત નિપજ્યું હતું.

ખાવડા પોલીસના જણાવ્યા પ્રમાણે અમદાવાદની ઇન્ફોચીપ્સ કંપનીના સાત સોફટવેર એન્જીનિયરો પોતપોતાની બાઇક ઉપર સફેદ રણની મોજ માણવા કચ્છ આવ્યા હતા.

દરમિયાન મૂળ જામનગરનાં સમીત કમલેશ પંડયા (ઉ.૨૫)ની બાઇક ભીરેડીયારાથી સફેદરણ ધોરડોના માર્ગ ઉપર સ્લીપ થઇ જતાં તેની સાથળ ચીરાઇ ગઇ હતી. ત્યાં ઘટના સ્થળે જ ઘણું બધું લોહી વહી જતાં સમીતનું અરેરાટીભર્યું મોત નિપજ્યું હતું. આ બનાવને પગલે ખાવડા, દિનારાના ગ્રામજનો, તબીબી સ્ટાફ, પોલીસ મદદરૂપ બન્યા હતા.