Gujarati News

દ્વારકા, તા. ર૬ : દ્વારકાએ હિન્દુ ધર્મનું મહત્વનું ધાર્મિક સ્થળ હોય દર વર્ષે અહીં કરોડો કૃષ્ણભકતો દર્શનાર્થે આવતા હોય દરેક યાત્રીક ભગવાન દ્વારકાધીશના દર્શન અચૂક કરે છે. આ દર્શનાર્થીઓમાં યુવાનો ઉપરાંત મોટી સંખ્યામાં વૃદ્ધો, અશકતો તેમજ સીનીયર સીટીઝન્સ તેમજ દિવ્યાંગો પણ ભગવાનના દર્શનાર્થે આવતા હોય છે. જેમના માટે સુવિધા કરવાના આશયથી ગઇકાલે યાત્રાધામ વિકાસ બોર્ડ દ્વારા ફાળવાયેલી દસ ઇ-રીક્ષા શરૂ કરવામાં આવી છે. દ્વારકાધીશ દેવસ્થાન સમિતિ દ્વારા આવા વૃદ્ધો, દિવ્યાંગો, અશકતો માટે જગતમંદિર પરિસરમાં દર્શનમાં સુવિધા રહે તે હેતુ ઇ-રીક્ષા સુવિધા શરૂ કરાઇ હોવાનું દ્વારકાધીશ દેવસ્થાન સમિતિના અહેવાલમાં જણાવાયું છે.

આ પ્રસંગે દ્વારકાધીશ દેવસ્થાન સમિતિના વહીવટદાર હરીશભાઇ ઢોલરીયા, સમિતિના સભ્યો પરેશભાઇ ઝાખરીયા, રમેશભાઇ હેરમા તથા દ્વારકા નગરપાલિકાના ચીફ ઓફીસર સી.બી. ડુડીયા, પ્રમુખ નીલાબેન ઉપાધ્યાય, ઉપપ્રમુખ પ્રધ્યુમનસિંહ જાડેજા વિગેરે ઉપસ્થિત રહ્યાં હતાં.