Gujarati News

રાજકોટ તા. ર૩: કુવાડવાના પારેવડા ગામમાં વીસ દિવસ પહેલા કુતરાઓને જોઇ બળદ ભડકતા દલીત વૃધ્‍ધ ગાડા ઉપરથી પટકાતા તેના પર ગાડાના વ્‍હીલ ફરી વળતા ઇજા થતા તેનું રાજકોટની સરકારી હોસ્‍પિટલમાં મોત નિપજયું હતું.

મળતી વિગત મુજબ પારેવડા ગામમાં રહેતા મુળાભાઇ કાળાભાઇ વાળા (ઉ.વ. ૭૦) ગત તા. પ/૧૦ના રોજ ગાડુ લઇને વાડીએ જતા હતા ત્‍યારે ગામમાં ગાડાની આડે અચાનક કુતરાઓ આવી જતા તેને જોઇ બંને બળદ ભડકતા દલીત વૃધ્‍ધ ગાડા પરથી પટકાયા હતા અને ગાડાનું વ્‍હીલ તેના પેટ ઉપર ફરી વળતા તેને ઇજા થઇ હતી. દેકારો બોલતા આસપાસના લોકો એકઠા થઇ ગયા હતા અને વૃધ્‍ધ મુળાભાઇને તાકીદે સારવાર માટે રાજકોટ સિવિલ હોસ્‍પિટલમાં ખસેડાયા હતા. ત્‍યાં ગઇકાલે તેનું સારવાર દરમ્‍યાન મોત નિપજયું હતું. આ અંગે કુવાડવા રોડ પોલીસ મથકના એએસઆઇ ફતેહસિંહ સોલંકી તથા જેન્‍તીભાઇએ કાર્યવાહી કરી હતી.