Gujarati News

(મુકુંદ બદીયાણી દ્વારા)જામનગર તા.૨૧, :જામનગર કોર્પોરેશનની ૧૬ વોડૅની ૬૪ બેઠકો માટે ચૂંટણી માટે શાંતિપૂર્ણ મતદાનનો પ્રારંભ  સવારે ૭ વાગ્યે થયો છે. જિલ્લા ચૂંટણી અધિકારી અને કલેકટર રવિશંકરએ મતદાન કર્યુ હતું જુદા જુદા બુથ ઉપર ચુસ્ત બંદોબસ્ત વચ્ચે  આગેવાનો અને નગરજનો મતદાન કરી રહ્યા છે.

        સ્થાનિક સ્વરાજયની ચૂંટણી-૨૦૨૧ અન્વયે મહાનગરપાલિકાની ચૂંટણીમાં જામનગર જિલ્લામાં શાંતિપૂર્ણ મતદાનનો પ્રારંભ થયો છે. આજે સવારથી જ લોકો મતદાન કેન્દ્રો ઉપર જઇ મતદાન કરી રહયા છે. મતદાન માટે કોરોના મહામારીને ધ્યાને લઇ માર્ગદર્શિકાનું પાલન કરવામાં આવી રહયું છે, જેમાં ટેમ્પરેચર ગન દ્વારા મતદાતાઓનું ટેમ્પરેચર ચેક કરી હેન્ડ સેનેટાઇઝ કર્યા બાદ ગ્લોવ્ઝ પહેરી મતદાન કરવાની વ્યવસ્થાઓ જિલ્લા વહીવટી તંત્ર તરફ્થી કરવામાં આવી છે. 

જામનગર ખાતેના વોર્ડ નં. ૯ મતવિસ્તારના વિભાજી ઇંગ્લીશ હાઇસ્કુલ ખાતે બુથ નં.૧૧માં જિલ્લા ચૂંટણી અધિકારી અને કલેકટરશ્રી રવિશંકરએ મતદાન કર્યુ હતું. વિભાજી ઇંગ્લીશ સ્કુલ ખાતે બુથ નં.૧૧માં ૨૦૪ પુરૂષો,૧૭૭ સ્ત્રીઓ મળી કુલ ૩૮૧ મતદાતાઓ નોંધાયેલા છે. 

  જિલ્લા ચૂંટણી અધિકારી અને કલેકટરશ્રી રવિશંકરએ મીડીયાને સંબોધતા જણાવ્યું હતું કે, સંપૂર્ણ જામનગર મહાનગરપાલિકા મતવિસ્તારના ૬૪૫ મથકોમાં સવારે ૦૭-૦૦ કલાકેથી શાંતિપૂર્ણ મતદાનનો પ્રારંભ થઇ ચુક્યો છે. જે બદલ વહિવટીતંત્રના તમામ સાથીઓને શુભેચ્છા પાઠવતા તેમણે જામનગરના નાગરિકોને કોરોના મહામારીને ધ્યાને લેતા તેના માટેની માર્ગદર્શિકાને અનુસરી તેમના મતાધિકારનો ઉપયોગ કરી લોકતંત્રને મજબુત બનાવવા માટેની અપીલ કરી હતી.