Gujarati News

રાજકોટ, તા. ર૧ : મુખ્યમંત્રીશ્રી વિજય રૂપાણી આવતીકાલે તા. ૨૧ અને ૨૨ જુલાઇના રોજ જૂનાગઢ અને દેવભૂમિ દ્વારકાની મુલાકાત લેશે.

મુખ્યમંત્રીશ્રી રૂપાણી આવતીકાલે તા. ૨૧ જુલાઇના રોજ સવારે ૧૦.૩૦ કલાકે કૃષિ યુનિવર્સિટી, જૂનાગઢ  ખાતે યોજાનાર ભકતકવિ નરસિંહ મહેતા યુનિવર્સિટીના પ્રથમ પદવીદાન સમારંભમાં ઉપસ્થિત રહેશે.

મુખ્યમંત્રીશ્રી બપોર બાદ દેવભૂમિ દ્વારકા ખાતે શીવરાજ બીચની સ્થળ મુલાકાત કરી  વિકાસ કામોનું નિરીક્ષણ કરી જરૂરી માર્ગદર્શન આપશે.

આ ઉપરાંત મુખ્યમંત્રીશ્રી રૂપાણી  સાંજે સરકીટ હાઉસ, દ્વારકા ખાતે જિલ્લામાં કોરોના રસીકરણની કામગીરી, શીવરાજપુર બીચના કામો અને બેટ દ્વારકા ખાતે તૈયાર થઈ રહેલા સિગ્નેચર બ્રિજની કામગીરી અંગે જિલ્લા વહીવટી તંત્રના અધિકારીઓ અને પદાધિકારીઓ સાથે સમીક્ષા બેઠક યોજશે.

મુખ્યમંત્રીશ્રી રૂપાણી તા. ૨૨, જુલાઇ ગુરૂવારના રોજ સવારે જગત મંદિર ખાતે ભગવાન શ્રી દ્વારકાધીશના દર્શન-પૂજા અર્ચના કરીને સાડા છ કરોડ ગુજરાતીઓની સુખ, સમૃદ્ધિ અને પ્રગતિ માટે ભગવાનને પ્રાર્થના કરીને આર્શીવાદ મેળવશે.