Gujarati News

Gujarati News

News of Tuesday, 20th April 2021

ભચાઉના છાડવારામાં રિક્ષા પર મહાકાય ઝાડ પડતા માતા-પુત્રના મોત

અચાનક કરા અને ભારે પવન સાથે વરસેલા વરસાદને કારણે રિક્ષા મહાકાય વડના ઝાડ નીચે ઉભી રાખી હતી

ભચાઉ : કચ્છમાં પલટાયેલા હવામાનના કારણે ભચાઉ શહેર અને તાલુકાના અનેક ગામડાઓમાં કરા સાથે કમોસમી વરસાદ ખાબક્યો હતો. પવનના ભારે સૂસવાટા સાથે પડેલા વરસાદને કારણે ભચાઉના છાડવારા ગામે એક કરૂણાંતિકા સર્જાઈ હતી. વોંધ ગામનો પરિવાર રિક્ષામાં જતો હતો. દરમ્યાન રિક્ષા ઉપર મહાકાય વડનું વૃક્ષ પડતા દબાઈ જવાથી માતા-પુત્રનું કરૂણ મોત નિપજ્યું હતું.

 પ્રાપ્ત વિગતો મુજબ વોંધ ગામે રહેતા ઈરફાન દાઉદ ઘાંચી નામનો યુવાન સહપરિવાર પોતાના રિક્ષામાં છાડવારા ગામેથી નીકળતો હતો તે દરમ્યાન અચાનક કરા અને ભારે પવન સાથે વરસેલા વરસાદને કારણે રિક્ષા મહાકાય વડના ઝાડ નીચે ઉભી રાખી હતી. દરમ્યાન પવનના ભારે સૂસવાટાના કારણે વડનું ઝાડ જમીનદોસ્ત થયું હતું , જેમાં આખેઆખી રિક્ષા ઝાડ નીચે ચગદાઈ ગઈ હતી. બનાવને પગલે તાત્કાલિક ૧૦૮ અને ભચાઉ પોલીસની ટીમ ઘટના સ્થળે દોડી ગઈ હતી. ભચાઉ પોલીસ મથકેથી પ્રાપ્ત વિગતો મુજબ વોંધમાં રહેતા ર૩ વર્ષિય ખતીજાબેન ઈરફાન ઘાંચી અને તેમના દોઢ વર્ષિય પુત્ર આફાન ઈરફાન ઘાંચીનું વડના ઝાડ નીચે ચગદાઈ જવાથી મોત નિપજ્યું હતું , તો પરિવારના સભ્યોમાં દાઉદ સુલેમાન ઘાંચી , કરીમા દાઉદ ઘાંચી અને રયાના રફીક ઘાંચીને ઈજાઓ પહોંચી હતી.

 બનાવને પગલે ઘટના સ્થળે ગ્રામજનોના ટોળા ઉમટી પડ્યા હતા. આગેવાનોએ બચાવ રાહત કામગીરી હાથ ધરી હતી. ઈજાગ્રસ્તોને ૧૦૮ મારફતે હોસ્પિટલમાં ખસેડાયા હતા , તો પોલીસે ધરાશાયી થયેલા ઝાડને દૂર ખસેડવા માટેના પ્રયાસો હાથ ધર્યા હતા.

(8:27 pm IST)
  • તેલંગણાના મુખ્યમંત્રીને કોરોના વળગ્યો : તેલંગણાના મુખ્યમંત્રી કે. ચંદ્રશેખર રાવને કોરોના પોઝિટિવ આવતા હાલમાં આઇસોલેશનમાં ડૉક્ટરોની નજર હેઠળ, પોતાના ફાર્મહાઉસમાં સારવાર લઈ રહ્યા છે. access_time 9:57 pm IST

  • બેંકોના મુખ્ય કર્મચારી સંઘે દાવો કર્યો છે કે ગુજરાતમાં અત્યાર સુધીમાં 15,000 બેંક કર્મચારીઓને કોરોના વાયરસનો ચેપ લાગ્યો છે. કોરોનાની બીજી લહેરમાં એપ્રિલ દરમિયાન છેલ્લા એક મહિનામાં 30 બેન્ક કર્મચારીઓએ જીવ ગુમાવ્યો છે. પ્રવર્તમાન સ્થિતિને ધ્યાનમાં રાખીને મહા ગુજરાત બેંક કર્મચારી સંઘ (MGBA) એ બેંકો માંથી રોકડ ઉપાડના કલાકોમાં ઘટાડો, વધારાની રજાઓ અને કામના કલાકોમાં છૂટછાટની માંગ કરી છે. access_time 12:05 am IST

  • 1 મે થી COVID-19 રસી 18 વર્ષની ઉપરના તમામ લોકો લઈ શકશે : રસી ઉત્પાદકો પૂર્વ ઘોષિત ભાવે ખુલ્લા બજારમાં પણ વેચી શકશે : PIBની વેબસાઇટ પર એક અખબારી યાદી મુજબ, રસી ઉત્પાદકોને તેમની રસી ઉત્પાદન ક્ષમતાનો 50% જથ્થો, રાજ્ય સરકારોને અને ખુલ્લા બજારમાં પૂર્વ ઘોષિત ભાવે મુક્ત રીતે વહેંચવાની સત્તા આપવામાં આવશે. access_time 9:57 pm IST