Gujarati News

રાજકોટ તા. ૧૯: જેતપુરમાં ધોરાજી રોડ પર જાગૃતિનગરમાં રહેતાં મધુબેન મુકેશભાઇ પરમાર (ઉ.૪૭) નામના રજપૂત મહિલાએ ગઇકાલે અગ્નિસ્નાન કરી લેતાં જેતપુર સારવાર અપાવી રાજકોટ સિવિલ હોસ્પિટલમાં ખસેડાયા હતાં. અહિ આજે સવારે દમ તોડી દેતાં પરિવારમાં શોક છવાઇ ગયો હતો.

હોસ્પિટલ ચોકીના રાજુભાઇ ગીડાએ જાણ કરતાં જેતપુર પોલીસે રાજકોટ આવી  જરૂરી કાર્યવાહી કરી હતી. પોલીસ તપાસમાં ખુલ્યા મુજબ મધુબેનના પુત્રવધૂ પૂજાબેનને શ્રાધ્ધ નિમીતે માવતરે મોરબી જવું હતું. તેણીને પોતાની સાથે દિકરા-દિકરીને પણ લઇ જવા હતાં. પરંતુ સાસુ મધુબેને સંતાનોનું ભણતર બગડશે તેમ કહી તેને જેતપુર જ રાખી જવા કહેતાં તે બાબતે બંને વચ્ચે ચડભડ થઇ હતી. એ પછી મધુબેનને માઠુ લાગતાં તેમણે અગ્નિસ્નાન કરી લીધું હતું.  મૃતકના પતિ દરજી કામ કરે છે.