Gujarati News

રાજકોટ:: રાજકોટ સહિત સૌરાષ્ટ્ર-કચ્છમાં ધીમે - ધીમે શિયાળાનો માહોલ જામતો જાય છે.લધુતમ તાપમાનનો પારો પણ નીચે ઉતરવા લાગે છે. આજે રાજ્યમાં સૌથી નીચું લઘુતમ તાપમાન કચ્છના નલિયામાં ૧૪.૦ ડિગ્રી રહ્યું હતું જ્યારે રાજકોટનું લઘુતમ તાપમાન ૧૫.૦ ડિગ્રી નોંધાયું હતું જેના કારણે ઠંડીની અસર વધુ અનુભવાઈ હતી. ઉપરાંત કચ્છના કંડલા એરપોર્ટ ઉપર લઘુતમ તાપમાન ૧૫.૬ ડિગ્રી , ભુજ ૧૬.૨ ડિગ્રી , અમરેલી ૧૬.૮ ડિગ્રી લઘુતમ તાપમાન નોંધાયું હતું.

હવે રાજ્યભરમાં ધીમે ધીમે ફૂલગુલાબી ઠંડીની શરૂઆત થઇ  છે. સાંજ પડતાં જ ધીમે ધીમે ઠંડીનો ચમકારો શરૂ થઇ જાય છે. વહેલી સવારે સ્વેટર સહિતના ગરમ કપડાંની યાદ જરૂર આવી જાય છે. ઠંડીની શરૂઆત થતાં જ લોકો વહેલી સવારે વોકિંગ કરવા અને કસરત કરવા નિકળી પડે છે. ત્યારે રાજકોટ સહિત સૌરાષ્ટ્ર-કચ્છમાં બેવડી ઋતુનો અહેસાસ થઇ રહ્યો છે. વહેલી સવારે ઠંડીનો ચમકારો જોવા મળી રહ્યો છે. ત્યારે બીજી તરફ બપોરે ગરમી અહેસાસ થઇ રહ્યો છે. જ્યારે ગુજરાતના અન્ય શહેરોમાં પણ ઠંડીનો અહેસાસ થઇ રહ્યો છે.               

ગઇકાલે નલિયાનું લઘુતમ તાપમાન ૧૫.૩ ડીગ્રી રહ્યું હતું તો મહત્તમ તાપમાન ૩૦.૪ ડીગ્રી નોંધાયું હતું. ગઈકાલે સોમવારે કેશોદનું લઘુતમ તાપમાન ૧૬.૩, પોરબંદર ૧૬.૬, રાજકોટ ૧૬.૯., વલસાડ ૧૭, અમરેલી ૧૭.૨, ગાંધીનગર ૧૭.૫, કંડલા ૧૭.૬ ડીગ્રી નોંધાયું હતું. તો બીજી તરફ  મહુવાનું મહત્તમ તાપમાન ૩૫ ડીગ્રી નોંધાયું, જ્યારે ઓખામાં મહત્તમ તાપમાન ૨૯.૬ ડીગ્રી રહ્યું હતું.