Gujarati News

પોરબંદર, તા.૧૪ : પોરબંદરમાં જન્મથી જ વિજાતિય અનુભુતિને પગલે બે વ્યક્તિએ સર્જરી થકી જેન્ડર ચેન્જ કરાવી છે. જેમાં પોરબંદર જિલ્લાના રાણાવાવ તાલુકાના ૩૪ વર્ષીય નાયબ મામલતદાર નિલેશ મહેતા જેન્ડર ચેન્જ કરાવીને બિજલ બન્યા છે, જ્યારે ૨૯ વર્ષીય એકાઉન્ટન્ટ ખુશ્બુ કક્કડ આદિત્ય બન્યા છે. પ્રાપ્ત માહિતી અનુસાર નિલેશ મહેતા આગામી બે વર્ષમાં સેક્સ રિએસાઈનમેન્ટ સર્જરી કરાવવાના છે. નિલેશ જેઓ પહેલાથી જ SRSના પ્રારંભિક તબક્કામાં છે, તેઓ પ્રક્રિયા પૂર્ણ થયા બાદ પોતાનું નામ બીજલ મહેતા તરીકે રાખશે.

૧૦નિલેશ મહેતાએ જણાવ્યું કે, મારા SRSમાં બેથી ત્રણ વર્ષ લાગશે. હાલમાં હું અમદાવાદમાં વિવિધ સારવારો કરાવી રહ્યો છું જેમાં પ્રી-એસઆરએસની જરૂર પડે છે.' મહેતાએ વધુમાં જણાવ્યું હતું કે તેઓ જેન્ડર ડિસફોરિયાથી પીડિત હતા જેથી પુરુષના શરીરમાં સ્ત્રી હોવા અંગેની અનુભૂતિ થતી હતી. પરિવાર પણ તેમના વિચારોથી સહેમત નહોતો, પરંતુ પછીથી તેઓએ તેમની લાગણીઓને ટેકો આપ્યો અને અમદાવાદમાં સારવાર શરૂ કરવામાં મદદ કરવાનું નક્કી કર્યું.

હાલમાં નિલેશ મહેતા મનોચિકિત્સક કાઉન્સેલિંગ અને હોર્મોન રિપ્લેસમેન્ટ થેરાપી ઉપરાંત વાળ દૂર કરવા, હેર ટ્રાન્સપ્લાન્ટ, આર્મ લિફ્ટિંગ સહિતની કોસ્મેટિક પ્રક્રિયાઓમાંથી પસાર થઈ રહ્યા છે. એકવાર શરીર સ્ત્રીમાં રૂપાંતરિત થઈ જાય પછી ડોકટરો મહેતા પર લિંગ પરિવર્તન સર્જરી શરૂ કરશે. હાલ મહેતાએ તેમની નોકરી ચાલુ રાખી છે. આ દરમિયાન જ્યારે પણ સારવાર માટે તેમને જરૂરી હોય ત્યારે જ રજા લે છે.

આદિત્ય બનવા ઇચ્છતા પોરબંદરના ૨૯ વર્ષીય એકાઉન્ટન્ટ ખુશ્બુ કક્કડ જેન્ડર ચેન્જ માટે દિલ્હીમાં જીઇજી સારવાર હેઠળ છે. તેણીએ પહેલેથી જ છાતીની સારવાર પૂર્ણ કરી લીધી છે અને હવે તે હોર્મોન સારવાર પર છે, જેમાં ઓછામાં ઓછું એક વર્ષ લાગશે તેવો દાવો કર્યો છે. કક્કડે ટાઈમ્સ ઓફ ઈન્ડિયાને જણાવ્યું કે, 'મારા પરિવાર તરફથી મને સંપૂર્ણ સમર્થન છે. નાનપણથી જ હું હંમેશા છોકરાની જેમ વર્તન કરું છે અને મારી માતા દ્વારા તૈયાર કરવામાં આવેલ ટિફિન પહોંચાડવામાં પણ મદદ કરું છું. હું હંમેશા છોકરાઓ સાથે રમું છું અને છોકરાઓની રમતો પસંદ કરું છું. ખુશ્બુએ મોંઘી સર્જરી કરાવવા માટે પૈસા પણ બચાવ્યા છે. ખુશ્બુએ કહ્યું કે, 'મેં મારો પગાર બચાવ્યો કારણ કે હું આ સર્જરી કરાવવા માંગતી હતી. મારા મિત્રો પણ મને આર્થિક મદદ કરી રહ્યા છે.'