Gujarati News

રાજકોટઃ જામનગરની 27 વર્ષીય યુવતી માટે સોશિયલ નેટવર્કિંગ સાઈટ ફેસબુક પર એક યુવક સાથે ફ્રેંડશીપ કરવી ખરાબ સ્વપ્ન સમાન સાબિત થયું. રાજકોટના આ યુવકે યુવતીને લગ્નની લાલચ આપીને તેની સાથે અનેક વખત દુષ્કર્મ કર્યું, સાથે જ યુવતીની સગાઈ પણ તોડાવી દીધી.

આ માનસિક ત્રાસ સહન ન થતાં જામનગરના ગાંધીનગરમાં રહેતી યુવતીએ હાર્દિક પંડ્યા નામના 30 વર્ષીય યુવાન સામે પોલીસ ફરિયાદ નોંધાવી છે. યુવક રાજકોટના રૈયા રોડ પાસેના ધરમનગર રોડ પર રહે છે. લગભગ દોઢ વર્ષ પહેલા હાર્દિકે યુવતી સાથે મિત્રતા કરી અને તેને પરણવાનું વચન આપ્યું. આ જ બહાના હેઠળ તેણે યુવતી સાથે અનેકવાર બળાત્કાર કર્યો અને તેની બીભત્સ તસવીરો પણ ખેંચી.

થોડા મહિના પહેલાં જ યુવતીને ખ્યાલ આવ્યો કે હાર્દિકને તેની સાથે લગ્ન કરવામાં નહીં પરંતુ શારીરિક સંબંધ બાંધવામાં જ રસ છે. જ્યારે યુવતીએ હાર્દિકને આ અંગે પૂછ્યું ત્યારે હાર્દિકે યુવતીને ધમકાવી અને તેની પાસે 3 લાખ રૂપિયા માગ્યા અને જો રૂપિયા ન આપે તો તેના ફોટો ફેસબુક પર અપલોડ કરવાની ધમકી આપી. જો કે, યુવતીએ તેને પૈસા ન આપ્યા અને તેની સાથેના તમામ સંબંધો તોડી નાખ્યા.

જામનગર B ડિવિઝનના પોલીસ ઈન્સ્પેક્ટર આર.જી. જાડેજાએ જણાવ્યું કે, થોડા સમય બાદ યુવતીએ કોઈ અન્ય વ્યક્તિ સાથે સગાઈ કરી લીધી. પરંતુ એક અઠવાડિયા પહેલા જ યુવતીની સગાઈ તૂટી ગઈ. હાર્દિકે યુવતીના વાંધાજનક ફોટો ફેસબુક પર અપલોડ કરતાં તેની સગાઈ તૂટી.એ બાદ હાર્દિકે ફરીથી યુવતીને ફોન કરીને તેની સાથે શારીરિક સંબંધ બાંધવા કહ્યું અને જો એમ ન કરે તો તેના માતા-પિતાને મારી નાખવાની ધમકી આપી.” જો કે હજુ આરોપી પોલીસ પકડની બહાર છે.