ધોલપુરથી કુવાડવા જીઆઇડીસીમાં પહોંચેલા ટ્રકની તાલપત્રી કાપી બે લાખના તલની ચોરી

News of Friday, 13th July 2018

ધોલપુરથી કુવાડવા જીઆઇડીસીમાં પહોંચેલા ટ્રકની તાલપત્રી કાપી બે લાખના તલની ચોરી

કુવાડવા પોલીસે ગુનો નોંધ્યોઃ ૧૧૦ બાચકા ખરેખર કયાં ચોરાયા તેનાથી ડ્રાઇવર અજાણ

રાજકોટ તા. ૧૩: રાજસ્થાનના ધોલપુરથી કુવાડવા જીઆઇડીસી સુધીમાં કોઇપણ સ્થળે ટ્રક ઉપરના દોરડા-તાલપત્રી કાપી કોઇ રૂ. ૨ લાખના તલના ૧૧૦ બાચકા ચોરી જતાં કુવાડવા પોલીસે ગુનો નોંધી તપાસ શરૂ કરી છે. બનાવ અંગે એરપોર્ટ રોડ ફાટક પાસે રઘુનંદન પાર્ક-૩માં રહેતાં મિલનભાઇ કાંતિલાલ બુધ્ધદેવ (ઉ.૫૫) નામના લોહાણા વેપારીએ ફરિયાદ નોંધાવી છે. તેણે જણાવ્યા મુજબ તેના મિત્ર રાજસ્થાનના ધોલપુરમાં ફેકટરી ધરાવે છે. ત્યાંથી ડ્રાઇવર સૂર્યપ્રકાશ તા. ૧/૭ના રોજ ટ્રક નં. આરજે૨૯જીએ-૧૮૫૨માં તલના બાચકા ભરી કુવાડવા આવવા રવાના થયો હતો. આ માલ કુવાડવા વીપીએન સન્સ ખાતે ઉતારવાનો હતો. આ રસ્તા પર કોઇપણ સ્થળે ટ્રક હોલ્ટ થયો ત્યારે કોઇએ દોરડા અને તાલપત્રી કાપીને ટ્રકમાંથી રૂ. ૨ લાખના તલના ૧૧૦ બાચકા ચોરી લીધા હતાં. કુવાડવા જીઆઇડીસીમાં ટ્રક હોલ્ટ થાય એ પહેલા વજન કરાવવામાં આવતાં વજન ઓછુ થતાં તપાસ કરતાં ચોરી થયાની જાણ થઇ હતી. ડ્રાઇવરે ધોલપુર શેઠને જાણ કરતાં શેઠે રાજકોટ રહેતાં મિત્ર મિલનભાઇને આ બાબતે વાત કરતાં તેમણે ફરિયાદ નોંધાવી છે. પી.આઇ. મોડીયાની રાહબરીમાં પીએસઆઇ એમ. કે. ઝાલા અને સ્ટાફે તપાસ શરૂ કરી છે. (૧૪.૫)