Gujarati News

(ભુજ) સાતમ આઠમના તહેવારો વચ્ચે શ્રમિક પરિવારમાં બનેલા બે મોતના બનાવને પગલે અરેરાટી સર્જાઈ છે. કચ્છના માંડવી તાલુકાના દેવપર (ગઢશીશા) ગામે ખેતમજૂરી કરતા આદિવાસી પરિવારને ત્યાં આ કમનસીબ બનાવ બન્યો હતો. 

મામા જયાં કામ કરતા હતા ને ત્યાં ફરવા આવેલા ભાણેજ સાથે મામાનું પણ મોત નીપજ્યું હતું. ૬ વર્ષનો સુખિત લાલા તડવી રમતા રમતા વાડીના પાણીના હોજમાં લપસીને ડૂબવા લાગ્યો હતો. જે જોઈને તેના મામા સંજય શિવા તડવીએ (ઉ.૩૬) હોજમાં ઝંપલાવ્યું હતું. જોકે, મામાને પણ તરતા આવડતું ન હોઈ તે પણ ડૂબવા લાગ્યા હતા. 

અંતે મામા ભાણેજ બન્ને હોજના પાણીમાં ગરકાવ થઈ ગયા હતા. પરિવારજનોની નજર સામે જ બનેલા આ બનાવને પગલે બુમરાણ મચી ગઇ હતી. ગઢશીશા પોલીસ ઘટના સ્થળે તરત જ ધસી આવી હતી. પણ, કમનસીબે મામા ભાણેજ બન્નેનું અરેરાટીભર્યું મોત નીપજ્યું હતું.