Gujarati News

રાજકોટ, તા. ૧૨ :. ગુજરાતની પ્રજા જેની લાંબા સમયથી રાહ જોઈ રહી હતી તે મેઘરાજાએ ઓગષ્ટના પ્રથમ ૧૦ દિવસમાં હેત વરસાવી ધરતીને ધરવી દીધી છે. મોટા ભાગે અછતનો વિસ્તાર ગણાતા કચ્છ જિલ્લામાં આ વખતે સરેરાશ વરસાદના ૧૦૧.૪૪ ટકા વરસાદ પડી ગયો છે. સરકારે ૧૯૮૯ થી ૨૦૧૮ સુધી રાજ્યમાં તાલુકાવાર પડેલા વરસાદના સરેરાશ આંકડાના આધારે આ વખતના વરસાદના તાલુકાવાર સરેરાશ આંકડા જાહેર કર્યા છે. તે મુજબ ૨૫૧ પૈકી ૫૧ તાલુકાઓમાં ૧૦૦ ટકાથી વધુ વરસાદ થઈ ગયો છે. અનેક ડેમોમાં નવા નીર આવ્યા છે. ગુજરાતને આવતુ આખુ વર્ષ પીવાના પાણીની નિરાંત થઈ ગઈ છે.

સૌરાષ્ટ્રમાં મોસમના કુલ વરસાદના સરેરાશ ૭૫.૯ ટકા વરસાદ થઈ ગયો છે. સૌથી વધુ ૧૦૧.૨૭ ટકા વરસાદ દક્ષિણ ગુજરાતમાં થયો છે. સૌથી ઓછો ૫૬.૫૬ ટકા વરસાદ ઉત્તર ગુજરાતમાં થયો છે. મધ્ય ગુજરાતમાં ૭૯.૯૧ ટકા વરસાદ થયો છે. રાજ્યનો સરેરાશ વરસાદ ૮૩.૯૫ ટકા થયો છે. જે તાલુકાઓમાં સરેરાશ મોસમનો ૧૦૦ ટકાથી વધુ વરસાદ થયો છે તેવા તાલુકાઓની નામાવલી નીચે મુજબ છે.