Gujarati News

 પોરબંદર તા. ૧ર :.. વીરડી પ્લોટ, ખત્રીવાડ, મેમણવાડા, કડીયા પ્લોટ, સહિત પછાત વિસ્તારોમાં પીવાના પાણીની લાઇનમાં ગટરનું પાણી ભળી જતાની અનેક ફરીયાદોમાં ધ્યાન અપાતું ન હોય રોષે ભરાયેલા લોકોએ પાલિકા કચેરીએ ચીફ ઓફીસરને ગઇકાલે ઘેરાવ કર્યો હતો. અઠવાડીયામાં આ પ્રશ્ને ધ્યાન નહીં અપાય તો ઉગ્ર આંદોલનની ચીમકી આપી છે.

 ઘેરાવ કાર્યક્રમમાં નગરસેવક સાજીદભાઇ ઉપસ્થિત રહેલ હતાં. તેઓએ ફરીયાદ કરી હતી કે અમારા વોર્ડ વિસ્તારના પ્રશ્ને દાદ મળતી નથી. અગાઉ અનેક વખત રજૂઆતો કરી છતાં ધ્યાન અપાતું નથી. નળમાં ગટરનું પાણી ભળતા આ પછાત વિસ્તારોમાં રોગચાળો માથુ ઉંચકી રહેલ છે લોકોએ મજબુરીથી બોરનું પાણી પીવું પડે છે. પરંતુ બોરનું પાણી પ્રદુષિત હોવાની ફરીયાદો છે. પાણીજન્ય રોગ વધ્યા છે.