Gujarati News

રાજકોટ તા. ૧૧: સૌરાષ્ટ્રના દરિયામાં ઉઠેલા વાવાઝોડા અને સંભવિત ખાનાખરાબીનો સામનો કરવા વીજ તંત્ર એલર્ટ બની ગયું છે, રાજકોટ કોર્પોરેટ ઓફીસથી ચીફ ઇજનેરો શ્રી ગાંધી શ્રી કોઠારી સતત મોનીટરીંગ કરી રહ્યા છે.

અધીકારી સુત્રોના ઉમેર્યા પ્રમાણે સૌરાષ્ટ્રના સાગરકાંઠા-પોરબંદર-જામનગર-વેરાવળ-અમરેલી-ભાવનગર જેવા ક્ષેત્રોમાં વિશેષ ટીમો ઉતારી દેવાઇ છે.

તો તમામ કોસ્ટલ વીજ સબ ડીવીઝનોમાં જરૂરી તમામ મટીરીયલ્સ અને સેંકડોની સંખ્યામાં વીજ થાંભલા તૈયાર રખાયા છે, ડેમેજ થાય એટલે તૂર્ત જ ટીમો દોડી જઇ વીજ પુરવઠો પુનઃ કાર્યાન્વીત કરવા ઓપરેશન હાથ ધરશે.

સાધનોએ ઉમેર્યું હતું કે તમામ પ્રકારના કોન્ટ્રાકટરો અને સ્ટાફને તૈયાર રખાયા છે. જામનગર માટે એડી. ચીફ ઇજનેરશ્રી ભટ્ટ તો પોરબંદર-ક્ષેત્ર માટે એડી. ચીફ ઇજનેરશ્રી અજાકિયાને સ્પે. હવાલો સોંપાયો છે. રાજકોટ કોર્પોરેટ ઓફીસથી સતત મોનીટરીંગ થઇ રહ્યું છે.