Gujarati News

ભુજ : કચ્છના પશ્ચિમી છેવાડે સુથરી અને તેની આસપાસના ગામોના દરિયા કિનારે અવારનવાર ચરસના બિનવારસુ પેકેટ મળી આવે છે. ડ્રગ પેડલરો દ્વારા કચ્છ અને ગુજરાતના અરબી સમુદ્રનો ઉપયોગ કેફી દ્રવ્યોની હેરફેર માટે વ્યાપક પ્રમાણમાં કરાઈ રહ્યો છે.

તે વચ્ચે આજે પશ્ચિમ કચ્છ એસઓજી એ સુથરી ગામે એક મકાન પર દરોડો પાડી ત્રણ શખ્સો ને ૧૭ શંકાસ્પદ પેકેટ સાથે ઝડપી પાડયા છે. પ્લાસ્ટિકના કાળા પેકેટ માં વિંટળાયેલા આ પેકેટ ચરસના હોવાની આશંકા છે. પોલીસે ચકાસણી માટે એફએસએલ માં મોકલવાની કાર્યવાહી હાથ ધરી છે. પ્રાથમિક માહિતી મુજબ માછીમારી નું કામ કરતા સૂથરીના શખ્સને દરિયામાંથી આ બિનવારસુ પેકેટ મળ્યા હતા. જેને પોતાને ઘેર લાવ્યા બાદ અન્ય બે મિત્રો સાથે મળી વેચવાની પેરવી હાથ ધરી હતી. પણ, તે પૂર્વે જ વેંચવાં અંગે બાતમી મળતાં પશ્ચિમ કચ્છ એસઓજી પોલીસે આ ૧૭ પેકેટ સાથે ૩ શખ્સોને રાઉન્ડ અપ કરી પૂછપરછ સાથે સઘન તપાસ હાથ ધરી છે.