Gujarati News

મોરબી અને જામનગર જીલ્લામાં છેલ્લા બે વર્ષથી તરખાટ મચાવતી વાહનચોર ગેંગને ઝડપી લેવામાં મોરબી પોલીસની ટીમને સફળતા મળી છે બે વર્ષમાં છકડો રીક્ષા અને પેસેન્જર રીક્ષા સહીત ૧૪ વાહનો ચોરી કરનાર ગેંગના ત્રણ ઇસમોને ઝડપી લઈને ૧૧ છકડો રીક્ષા, એક રીક્ષા, બે મોપેડ સહિતનો મુદામાલ કબજે લીધો છે

મોરબી જીલ્લા પોલીસવડા એસ આર ઓડેદરાના માર્ગદર્શન હેઠળ એલસીબી ઇન્ચાર્જ પીઆઈ જે એમ આલની ટીમ વાહનચોરી કરતી ગેંગને ઝડપી લેવા તપાસ ચલાવતી હોય જેમાં એલસીબી ટીમના નિર્મળસિંહ જાડેજા, આસિફભાઈ ચાણકયા અને ભરતભાઈ જીલરીયાને બાતમી મળી હતી કે વાહન ચોરી કરનાર ગેંગના આરોપી જગદીશ ઉર્ફે જગા સામત પરમાર, અનીલ ઉર્ફે ઠુંઠો સામત પરમાર અને વિક્રમ રામજી પરમાર એ ત્રણેય ઈસમો મોરબીના શનાળા રોડ નવા બસ સ્ટેન્ડ સામેથી પસાર થવાના હોય જેથી વોચ ગોઠવી હતી અને ત્રણેય ઈસમો છકડો રીક્ષા લઇ પસાર થતા આરોપીને ઝડપી લઈને સઘન પૂછપરછ કરતા ત્રણેય ઇસમોએ છેલ્લા અઢી વર્ષ દરમિયાન મોરબી શહેર અને જામનગર શહેરમાંથી છકડો રીક્ષા, મોપેડ સહીત કુલ ૧૪ વાહનોની ચોરી કરી હોવાની કબુલાત આપી હતી

જેને પગલે એલસીબી ટીમે આરોપી જગદીશ ઉર્ફે જગા સામત પરમાર (ઉ.વ.૨૨), અનીલ ઉર્ફે ઠુંઠો સામત પરમાર (ઉ.વ.૩૦) અને વિક્રમ રામજી પરમાર (ઉ.વ.૪૦) રહે ત્રણેય મૂળ જામ ખંભાળિયા હાલ રાજકોટ જામનગર રોડ ઘંટેશ્વર એસઆરપી કેમ્પના પાટિયા પાસે ઝુપડામાં એ ત્રણ ઇસમોને ઝડપી લઈને આરોપી પાસેથી ચોરીમાં ગયેલ મુદામાલ ૧૧ છકડો રીક્ષા,૧ પેસેન્જર રીક્ષા અને ટીવીએસ તેમજ બજાજના ૨ મોપેડ સહીત કુલ ૧૪ વાહનો રીકવર કરવામાં આવ્યા છે અને મોરબી તેમજ જામનગર જીલ્લામાંથી થયેલ કુલ ૧૨ ચોરીના ગુન્હાનો ભેદ ઉકેલવામાં સફળતા મળી છે