Gujarati News

(અશોક પાઠક દ્વારા) કોડીનાર, તા.૬: હિન્‍દુ પરંપરા અનુસાર હોળીના તહેવાર પ્રસંગે  જે પરિવારમાં હોળી પહેલા જન્‍મેલ બાળકની પ્રથમ હોળી પર વાડ(વાજતે-ગાજતે હોળી ફરતે બાળકની પ્રદક્ષિણા ફરવાની પ્રથા)  કાઢવાની વર્ષોથી પરંપરા ચાલી આવે છે. આ પ્રસંગે   દરેક પરિવારો પોતાનાં પ્રસંગમા પરિવારજનો તેમજ સગા સંબંધીઓ અને ગામ લોકોને આમંત્રિત કરી ભોજન સમારંભ ગોઠવી પોતાની ખુશી વ્‍યક્‍ત કરતા હોય છે. એક જ ગામમાં ૪ થી ૫ બાળકોનો જન્‍મ થયો હોય ત્‍યારે નાના ગામમાં સૌને સબંધ હોય દરેકને ત્‍યાં જમવા જવું શકય બનતું નથી. આથી ભોજનનો બગાડ થવાની સંભાવના વધી જાય છે. આ ઉપરાંત ખોટો ખર્ચ પણ વધી જાય છે. આથી શેઢાયા ગામના લોકોએ અને અગ્રણીઓ એ નક્કી કર્યું કે સમૂહ વાડ કાઢવી અને સમૂહ જમણવાર જ કરવો જેથી સૌને પોષાય અને દરેકની હાજરી પણ રહે અને ઓછા ખર્ચમાં સામુહિક પ્રસંગ ઉજવાય. ગામના કળષ્‍ણ મંદિરે આ નિર્ણય લેવાયો અને તેનો તાત્‍કાલિક આ વર્ષથી અમલ પણ શરૂ કરવામાં આવ્‍યો. જે નાના એવા ગામની આવકારદાયક અને પ્રેરણારૂપ ઘટના છે.