વાહ ભૈ વાહ

રાજકોટની અંદાજિત ૫૦ પ્રાઇવેટ-સેલ્ફ ફાયનાન્સ સ્કુલો કેમ્પસમાં ગૌશાળા બનાવવાનું વિચારી રહી છે

ગાયનું મહત્વ અને તેના દુધ કે અન્ય પ્રોડકટના ફાયદા વિશે વિદ્યાર્થીઓને માહિતગાર કરવાનો હેતુ

રાજકોટઃ ટૂંક સમયમાં રાજકોટની પ્રાઈવેટ સ્કૂલના વિદ્યાર્થીઓ તેમના કેમ્પસમાં જ ગાયને ખવડાવતા અને દૂધ દોહતા જોવા મળશે. રાજકોટની અંદાજિત ૫૦ પ્રાઈવેટ અને સેલ્ફ ફાયનાન્સ સ્કૂલો પોતાના કેમ્પસ કે અન્ય પ્લોટમાં ગૌશાળા બનાવવાનું વિચારી રહી છે. આ વિચાર પાછળનો હેતુ શહેરના વિદ્યાર્થીઓને ગાયનું મહત્વ તથા તેના દૂધ કે અન્ય પ્રોડકટ્સના ફાયદાઓ શીખવવાનો છે.

રવિવારે આ પ્રકારની ગૌ શાળા શહેરના મોટા મૌવામાં આવેલી એક પ્રાઈવેટ સ્કૂલમાં ખુલ્લી મુકાઈ. અંદાજે ૨૦૦૦થી વધારે વિદ્યાર્થી ધરાવતી સ્કૂલના ટ્રસ્ટીએ જણાવ્યું કે, થોડા મહિના અગાઉ અમને ૧૪ ગાય મળી હતી. હોસ્ટેલમાં રહેતા વિદ્યાર્થીઓ તેમની દેખરેખ કરતા. અમે હવે આ કોન્સેપ્ટને બધા વિદ્યાર્થીઓ માટે લાવી રહ્યા છીએ. વિદ્યાર્થીઓને અઠવાડિયામાં ૨ કલાક માટે ગૌશાળામાં જવા માટે કહેવાશે. અહીં તેઓ ગાયની જૂદી જૂદી ઓલાદનું મહત્વ, ગૌમૂત્ર, છાણ, દૂધ અને દૂધની અન્ય પ્રોકડ્ટ્સનું મહત્વ સમજશે.

ઘણા એવા સંપન્ન પરિવારના વિદ્યાર્થીઓ છે જેઓ શહેરમાં રહે છે અને ગૌ ઉછેરના કામ સાથે જોડાયેલા નથી. અમે તેમને બતાવવા ઈચ્છીએ છીએ કે પશુપાલન જો સારી રીતે કરવામાં આવે તો તેમા કેટલી સારી બિઝનેસની તકો રહેલી છે. આ કોન્સેપ્ટને ઝડપથી અન્ય સ્કૂલોએ પણ સ્વીકારી લીધો.રાજકોટની સેલ્ફ-ફાયનાન્સ સ્કૂલ મેનેજમેન્ટ અસોસિયેશનના પ્રેસિડેન્ટ અજય પટેલે કહ્યું, આ કન્સેપ્ટનું અમલીકરણ રાજકોટમાં અંદાજિત ૫૦ જેટલી સ્કૂલો કરવા ઈચ્છે છે. તેમાંથી ચાર-પાંચ સ્કૂલોએ ગૌ શાળા શરૂ પણ કરી દીધી છે. વિદ્યાર્થીઓને ગાયનું છાણ, ગૌ મૂત્ર અને અન્ય વસ્તુઓનું મહત્વ સમજાવવાનું લાભદાયી થશે.

રાષ્ટ્રીય કામધેનુ બોર્ડના ચેરમેન વલ્લભ કથિરીયાએ કહ્યું, સ્કૂલોમાં ગૌ શાળાને પ્રોત્સાહન આપવાથી ગાયની જૂદી જૂદી ઓલાદનું સંવર્ધન આગળ વધશે. વિદ્યાર્થીઓ પશુપાલનના વ્યવસાયમાં કમાણીની તકોથી માહિતગાર થશે. અમે પહેલાથી જ સ્કૂલો અને આધ્યાત્મિક સ્થાનોમાં ગૌ શાળા શરૂ કરવા માટે વર્કશોપ કરવા ઉપરાંત ગૌ શેડ, ગોબર ગેસ પ્લાન્ટમાં પણ સબસિડી આપી રહ્યા છીએ.