પોપટપરાના નિલેષ કોળીને ઉછીના પૈસા બાબતે મિત્ર ચિરાગે છરીના બે ઘા ઝીંકયા
નિલેષે બીજા મિત્ર નિતીન પાસેથી પોતે બે દિવસ પછી પૈસા લઇને આપશે તેમ કહેતાં માથાકુટ
રાજકોટ તા. ૨૬: પોપટપરા કૃષ્ણનગર-૫/૩ના ખુણે રહેતાં રિક્ષાચાલક નિલેષ ભૂપતભાઇ ડેડાણી (ઉ.૨૩) નામના કોળી યુવાનને તે રાત્રે સાડા અગિયારેક વાગ્યે જુના મોરબી રોડ પર રાજ વે બ્રીજ પાસે હતો ત્યારે તેના જ મિત્ર રિક્ષાચાલક ચિરાગ ઉર્ફ ભાણો સાજનભાઇ જોષીએ ઝઘડો કરી છાતીમાં છરીના બે ઘા ઝીંકી દેતાં સિવિલ હોસ્પિટલમાં દાખલ કરાયો હતો.
બનાવની જાણ થતાં બી-ડિવીઝનના પીએસઆઇ વી. કે. ઝાલાએ હોસ્પિટલે પહોંચી નિલેષની ફરિયાદ પરથી ચિરાગ ઉર્ફ ભાણા સામે ગુનો નોંધ્યો હતો. નિલેષના કહેવા મુજબ ચિરાગને દસ હજાર રૂપિયાની જરૂર હોઇ આ રકમ બીજા મિત્ર નિતીન નંદા પાસેથી લઇ દેવાનું કહ્યું હતું. પણ નિતીન પાસે હાલમાં પૈસા ન હોઇ પોતે બે દિવસ પછી તેની પાસેથી અપાવી દેશે તેમ કહેતાં ચિરાગ ઉશ્કેરાયો હતો અને આજે જ પૈસા આપવા પડશે...તેમ કહી ઝઘડો કરી છરી કાઢી બે ઘા ઝીંકી દીધા હતાં. પોલીસે તેને ઝડપી લેવા તપાસ હાથ ધરી છે.