મારામારીના સમાધાનના પૈસા મામલે રૈયાધારના વિજય ઉર્ફ કાલી પર હુમલો

રાહુલ ઉર્ફ ટાલો અને પિયુષ રાવળદેવે ધોકાવાળી કરી

રાજકોટ તા. ૧૯: રૈયાધારમાં પાણીના ટાંકા પાસે રહેતાં અને બકાલાનો ધંધો કરતાં વિજય ઉર્ફ કાલી વિનુભાઇ સોલંકી (ઉ.૨૫) નામના દેવીપૂજક યુવાન પર રાત્રીના બે વાગ્યે રાહુલ ઉર્ફ ટાલો ચોૈહાણ નામના ભીલ શખ્સ તથા તેના મિત્ર પિયુષ રાવળદેવ ઉર્ફ મહાદેવે ધોકાથી હુમલો કરી પગમાં ગંભીર ઇજાઓ કરતાં સિવિલ હોસ્પિટલમાં દાખલ કરાયો છે.

હોસ્પિટલ ચોકીના ડી. કે. ખાંભલા અને દિપસિંહ ચોૈહાણે આજીડેમ પોલીસને જાણ કરી હતી. વિજય ઉર્ફ કાલીના કહેવા મુજબ અગાઉ પોતાને ટાલા અને પિયુષ સાથે ઝઘડો થયો હોઇ જેથી તે વખતે પગ ભાંગી જતાં સારવારનો દોઢેક લાખનો ખર્ચો થયો હતો. જે તે વખતે સમાધાન થયું ત્યારે ટાલાએ પોતે એક લાખ ખર્ચ પેટે ચુકવી આપશે તેવી બોલી કરી હતી. આ પૈસાની વિજય ઉર્ફ કાલીએ ઉઘરાણી કરતાં રાત્રીના ટાલા અને પિયુષે પૈસા લઇ જવાનું કહેતાં પોતે પાણીના ટાકા પાસે જતાં દગાથી હુમલો કરાયો હતો. પોલીસે ફરિયાદ નોંધવા તજવીજ કરી છે.