ગીતાનગરમાં પારૂલબેન વ્યાસના ઘરમાં ૬૧ હજારની ચોરીઃ કામવાળીની ધરપકડ

દોઢ મહિના પહેલા સુધા પરમારે રોકડા ૧૬ હજાર અને ૪૫૬૫૭ના દાગીના ચોર્યા'તાઃ ભકિતનગર પોલીસે ભેદ ઉકેલ્યો

રાજકોટ તા. ૧૭: ઢેબર રોડ પર ગીતાનગર-૩માં રહેતાં પારૂલબેન પ્રવિણભાઇ વ્યાસ (ઉ.૫૨)ના ઘરમાં દોઢ મહિના પહેલા ૬૧ હજારની ચોરી થઇ હતી. આ ચોરીનો ભેદ ભકિતનગર પોલીસે ઉકેલી અગાઉ પારૂલબેનના મકાનમાં ઘરકામ કરવા આવતી મહિલા સુધાબેન જગદીશભાઇ પરમાર નામની મહિલાને સકંજામાં લઇ પુછતાછ હાથ ધરી છે.

પારૂલબેન વ્યાસના ઘરમાં તા. ૨૬/૯ના રોજ રૂ. ૧૬ હજારની રોકડ તથા રૂ. ૪૫૬૫૭ના સોનાના દાગીનાની ચોરી થઇ હતી. આ અંગે જે તે વખતે ફરિયાદ કરી નહોતી. બાદમાં શંકા પરથી અરજી કરવામાં આવી હતી. તેના આધારે તપાસ થતાં આ ચોરી ગોકુલધામ પાછળ સરસ્વતિનગરમાં રહેતી સુધાબેન જગદીશભાઇ પરમારે કર્યાનું જણાતાં ભકિતનગર પોલીસે આ અંગે ગુનો નોંધી વધુ તપાસ હાથ ધરી છે.