સરદારનગરમાં સ્મિતાબેનના હાથમાંથી હેલ્મેટ પહેરેલા બે શખ્સ પર્સ ખેંચી ગયા

ગયા મહિનાનો બનાવઃ હવે ગુનો નોંધાયોઃ ભેદ ઉકેલાય તેવી કડી મળી

રાજકોટ તા. ૧૧: રેસકોર્ષ રીંગ રોડ પર બિગ બાઇટ પાછળ ગુરૂદર્શન એપાર્ટમેન્ટ ફલેટ નં. એ-૩માં રહેતાં સ્મિતાબેન મુકેશભાઇ વોરા (ઉ.૬૧) તા.૨૫/૫ના રોજ સરદરનગર રોડ શેરી નં. ૨૧માં ખરીદી કરવા ગયા ત્યારે બપોરે બારેક વાગ્યે તેમના હાથમાંથી હેલ્મેટ પહેરીને બાઇક પર આવેલા બે શખ્સો કાળુ પર્સ ખેંચી ભાગી ગયો હતો. જેમાં એ-૭ સેમસંગ મોબાઇલ ફોન રૂ. ૧૮૯૯૦નો તથા રોકડા રૂ. ૫૦૦ હતાં. ચિલઝડપનો આ ગુનો ઉકેલાઇ જાય તેવી કડી ક્રઇામ બ્રાંચને મળી છે.

સ્મિતાબેન ઘરેથી ૨૫મીએ પોતાનું એકટીવા જીજે૩ઇએમ-૩૪૮૩ લઇને સરદારનગર-૧માં પ્રકાશ હાર્ડવેર ખાતે ખરીદી માટે ગયા હતાં. ત્યાં પોતાનું વાહન પાર્ક કરી રહ્યા હતાં ત્યારે બાઇક પર બે શખ્સ આવ્યા હતાં અને બંનેએ હેલ્મેટ પહેરેલા હતાં. આ બંને નજીક આવ્યા હતાં અને બાઇક પાછળ બેઠેલા શખ્સે સ્મિતાબેનના હાથમાંથી પર્સની ઝોંટ મારી હતી. તેમણે બૂમાબૂમ કરતાં માણસો ભેગા થઇ ગયા હતાં. પરંતુ એ પહેલા બંને ભાગી ગયા હતાં.

આજ સુધી ઘરમેળે તપાસ કરી હતી. પરંતુ ચિલઝડપકારનો પત્તો ન મળતાં અંતે હવે એ-ડિવીજનમાં જાણ કરતાં પીએસઆઇ પી. પી. ચાવડાએ ગુનો દાખલ કર્યો છે.