કાલે ડેરીના ચેરમેનની ચૂંટણીઃ ગોવિંદભાઇ રીપીટની શકયતા પણ આંતરિક ખેંચતાણ

મતદાર સભ્યોને 'સલામત' સ્થળે ખસેડવાનું શરૂ

રાજકોટ તા. ૮: જિલ્લા દુધ ઉત્પાદક સહકારી સંઘના ચેરમેનની આવતીકાલે શુક્રવારે સાંજે ૪ વાગ્યે ચૂંટણી છે વર્તમાન ચેરમેન ગોવિંદભાઇ રાણપરિયા ફરી ચેરમેન થવા ઉત્સુક છે તેમને બિનહરીફ થવાનો વિશ્વાસ છે પરંતુ અંદરખાને અમુક સભ્યોએ માથું ઉંચકતા સહકારી ક્ષેત્રે રાજકીય ગરમાવો આવી ગયો છે.

ડેરીમાં ચૂંટાયેલા ૧૪ સભ્યો ઉપરાંત બેંક, વ્યકિતગત વિભાગ, ફેડરેશન અને જિલ્લા રજીસ્ટ્રાર મળી ૧૮ સભ્યો છે અમૂક સભ્યો ગોવિંદભાઇને ફરી ઇચ્છતા ન હોવાથી અલગ ચોકો જમાવવા પ્રયાસ થઇ રહ્યાનું ચર્ચાઇ રહ્યું છે. ૮ થી ૧૦ જેટલા સભ્યો સલામત સ્થળે પહોંચી ગયા છે. આવતીકાલે સીધા મતદાન સમયે લાવવામાં આવશે. વિઠ્ઠલભાઇ રાદડિયા હોસ્પિટલમાં હોવાથી તેમની ગેરહાજરી આ ચૂંટણીમાં દેખાઇ રહી છે.