Gujarati News

રાજકોટ તા. ૩૦ : કુવાડવા રોડ જી.આઇ.ડી.સી.વીરલ વેબ્રીજ સામે રોડ ક્રોસ કરતી વખતે અજાણ્યા વાહને ઠોકર મારતા જુનાગઢના નિવૃત એસ.ટી.ના કંડકટરનું મોત નિપજાવી વાહન ચાલક વાહન લઇ ભાગી જતા ફરીયાદ થઇ છે.

મળતી વિગત મુજબ જુનાગઢના વતની અને છેલ્લા પાંચ વર્ષથી કુવાડવા જી.આઇ.ડી.સી. પાસે ગુરૂદત્ત ગીરનારી આશ્રમમાં રહીને સેવાપુજા કરતા એસ.ટી.ના નિવૃત કંડકટર બાબુભાઇ જેરામભાઇ વાઘેલા (ઉ.૭પ) ગઇકાલે પોતાનું પેન્સન લેવા માટે જુનાગઢ ગયા હતા અને જુનાગઢથી પરત આવ્યા ત્યારે તેઓ કુવાડવા જીઆઇડીસી પાસે વીરલ વે બ્રીજની સામે રોડક્રોસ કરતા હતા ત્યારે કોઇ વાહનના ચાલકે વૃધ્ધને ઠોકર મારી પોતાનું વાહન લઇ ભાગી ગયો હતો. બાબુભાઇનું સ્થળ પર મોત નિપજયું હતું.બનાવ બનતા આસપાસના લોકો એકઠા થઇ ગયા હતા અને નાસી જનાર વાહન નંબર જીજે.૩ એઝેડ-૯૧૭૦ હોવાનું જાણવા મળ્યું હતું આ બનાવની જાણ થતા કુવાડવા રોડ પોલીસ મથકના પી.એસ.આઇ. પી.સી.મોલીયા તથા હેડ કોન્સ્ટેબલ હમીરભાઇએ સ્થળ પર પહોંચી કુવાડવાના અમૃતભાઇ દાનાભાઇ ચાવડા (ઉ.પ૩) ની ફરીયાદ પરથી જીજે-૩ એઝેડ-૯૧૭૦ નંબરના વાહન ચાલક વિરૂધ્ધ ગુનો દાખલ કરી તપાસ હાથધરી છે. મૃતક બાબુભાઇને સંતાનમાં ત્રણ પૂત્રી અને એક પુત્ર છે.