Gujarati News

રાજકોટ, તા. ૨૭ :. ચૂંટણી પંચ દ્વારા હાલ રાજકોટ સહિત રાજ્યભરમાં મતદાર યાદી ચકાસણી કાર્યક્રમ ચાલી રહ્યો છે. ૧લી સપ્ટેમ્બરથી આ કાર્યક્રમ શરૂ થયો છે. આમા લોકોને અપીલ કરાઈ છે કે મતદારો પોતાનું નામ ચકાશે, બરોબર છે કે કેમ, તે જૂએ, ફેરફાર હોય તો તે મુજબનું ફોર્મ ભરે, પરંતુ મતદારોમાં માત્ર ૨ થી ૨ાા ટકા જાગૃતિ આવી છે.

રાજ્યભરના આંકડાકીય માહિતી તપાસતા તા. ૨૬ની સ્થિતિ મુજબ રાજકોટ ઉપરાંત અન્ય ૭ જીલ્લામાં મતદાર યાદી ચકાસણી કાર્યક્રમને રાજ્યભરમાં સૌથી વધુ નબળો પ્રતિસાદ મળ્યો છે. રાજકોટ શહેર-જિલ્લામાં કુલ ૨૧ લાખથી વધુ મતદારો છે, તે સામે માત્ર ૪૮ હજાર લોકોએ પોતાના નામો અંગે ચકાસણી કરી છે.

રાજકોટ જીલ્લા ચૂંટણી તંત્રે પોતાના પ્રાંત-મામલતદારો મારફત અનેક સેમીનારો કર્યા, અપીલો કરી, અખબારોમાં વારંવાર યાદીઓ આપી, પણ લોકોને કોઈ રસ જ ન હોય તેમ માત્ર ૪૮ હજાર મતદારોએ ચકાસણી કરી.

ચૂંટણી અધિકારી સૂત્રોએ ઉમેર્યુ હતુ કે લોકો સમજે તો સારૂ, પોતાના નામ, સરનામા, ફેરફાર વગેરેની ચકાસણી કરવી જરૂરી છે, પરંતુ લોકો સમજતા જ નથી.

અત્રે એ નોંધનીય છે કે, ૧લી તારીખથી શરૂ થયેલ. આ કાર્યક્રમ સંદર્ભે નામ ઉમેરવા માટે રાજકોટ શહેર-જીલ્લામાં ૨૮૦૦થી વધુ ફોર્મ ભરાયા છે.