Gujarati News

રાજકોટઃ શહેર પોલીસે થોડા દિવસ પહેલા દૂધ સાગર રોડ હાઉસીંગ બોર્ડ વિસ્તારમાં રહેતાં ઇમ્તિયાઝ ઉર્ફ લાલો ભીખુભાઇ રાઉમા અને તેની ટોળકીના ૧૦ શખ્સો વિરૂધ્ધ ધી ગુજરાત કન્ટ્રોલ ઓફ ટેરરીઝમ એન્ડ ઓર્ગેનાઇઝ ક્રાઇમ એકટ ૨૦૧૫ની કલમો હેઠળ ગુનો નોંધી કડક કાર્યવાહી કરતાં પોલીસની આ કાર્યવાહીને દૂધ સાગર રોડ હાઉસીંગ બોર્ડ વિસ્તારના રહેવાસીઓએ બિરદાવી છે. લોકોએ પોલીસ કમિશનર મનોજ અગ્રવાલ, જેસીપી ખુરશીદ અહેમદ, ડીસીપી પ્રવિણકુમાર મીણા, એસીપી એચ. એલ. રાઠોડ અને પીઆઇ જી.એમ. હડીયાને અભિનંદન પાઠવ્યા હતાં. થોરાળા પોલીસ સ્ટેશન ખાતે નાગરિકો, ખાસ કરીને મહિલાઓએ પહોંચી એસીપી એચ.એલ. રાઠોડ અને પીઆઇ જી. એમ. હડીયાનું સોશિયલ ડિસ્ટન્સ રાખી સન્માન કરી આભાર વ્યકત કર્યો હતો. ટોળકીની ગુનાખોરીને ડામવા પોલીસે લીધેલા ગુજકોટોક હેઠળના પગલાને લોકોએ આવકાર્યુ હતું.