Gujarati News

રાજકોટ તા. ૨૪: અમીન માર્ગ નર્મદા પાર્ક-૩માં રાત્રીના દસેક વાગ્યે રાજકોટ જીલ્લા જળસ્ત્રાવ વિકાસ એકમના એન્જિનીયરના ૬ વર્ષના પુત્રને તે  શેરીમાં રમતો હતો ત્યારે  એકટીવા ચાલક યુવતિ ઠોકરે ચડાવી ભાગી જતાં બાળકને ઇજાઓ થતાં સારવાર માટે દાખલ કરાયો છે.

આ બનાવ અંગે માલવીયાનગર પોલીસે ગોંડલના આશુતોષ ચંદુલાલ ભાલાળા (ઉ.વ.૩૪)ની ફરિયાદ પરથી જીજે૦૩કેકયુ-૫૫૨૯ની ચાલક સામે ગુનો નોંધી તપાસ હાથ ધરી છે. આશુતોષ ભાલાળા રાજકોટ જુની કલેકટર કચેરી જીલ્લા જળસ્ત્રાવ વિકાસ એકમમાં એન્જિનીયર તરીકે ફરજ બજાવે છે. તેમણે ફરિયાદમાં જણાવ્યું છે કે હું ગોંડલ મારા પત્નિ તથા ૬ વર્ષના પુત્ર પાર્થ સાથે રહુ છું અને રાજકોટ નોકરી કરુ છું. ૨૧/૨ના રોજ મારો દિકરો પાર્થ તેના મામા મિહીરભાઇ વસોયા સાથે રાજકોટ અમીન માર્ગ પાસે નર્મદા પાર્ક-૩માં રહેતાં મિહીરભાઇના માસી રીનાબેન દેસાઇને ઘરે રોકાવા આવ્યો હતો. મંગળવારે ૨૩મીએ સાળા મિહીરભાઇનો ફોન આવ્યો હતો કે પાર્થ રાતે દસેક વાગ્યે શેરીમાં રમતો હતો ત્યારે એક છોકરીએ પુરપાટ ઝડપે એકટીવા હંકારી પાર્થને હડફેટે લઇ ઇજા પહોંચાડતાં તેને રાજનગર ચોકની શારદા હોસ્પિટલમાં દાખલ કર્યો છે.

આથી હું ગોંડલથી મારા પત્નિ સંસ્કૃતિને લઇને રાજકોટ પહોંચ્યો હતો. હોસ્પિટલમાં જોતાં મારા દિકરાને માથામાં ડાબી બાજુ, ડાબા કાન પાછળ, મોઢામાં ઉપરના દાંત-પેઢામાં અને પગના ભાગે ઇજાઓ થયેલી જોવા મળી હતી. સાળા મિહીરભાઇએ મને કહેલુ કે બહાર શેરીમાં પાર્થ રમતો હતો ત્યારે એક છોકરીના એકટીવાની ઠોકરે તે ચડી ગયો છે. અકસ્માત સર્જી એ છોકરી ભાગી ગઇ છે. પણ એકટીવાનો ફોટો પાડી લીધો છે, જેના નંબર જીજે૦૩કેકયુ-૫૫૨૯ છે. માલવીયાનગરના એએસઆઇ ગીતાબેન વાય. પંડ્યાએ ગુનો નોંધી અકસ્માત સર્જી ભાગી ગયેલી એકટીવાચાલક છોકરીની તપાસ શરૂ કરી છે.