Gujarati News

Gujarati News

News of Tuesday, 23rd February 2021

વિજય સરઘસમાં સોશિયલ ડિસ્ટન્સ, માસ્ક સહિતના નિયમોનું કડક પાલન કરવાનું રહેશેઃ પોલીસ કમિશનર મનોજ અગ્રવાલ

રાજકોટ તા. ૨૨: આજે જાહેર થયેલા મ્યુનિસિપલ કોર્પોરેશનની ચુંટણીના પરિણામોમાં ઠેકઠેકાણે કમળ ખીલી ગયું છે. રાજકોટમાં છ સ્થળોએ મત ગણતરી  રાખવામાં આવી હતી. જેમ જેમ ગણતરી થતી રહી અને વિજેતા ઉમેદવારોના નામ સામે આવતાં રહ્યા તેમ તેમ મત ગણતરી સ્થળે જ ઉમેદવારો, કાર્યકરોમાં ઉત્સાહ છવાતો ગયો હતો અને ત્યાં જ ઉજવણી શરૂ કરી દીધી હતી. અહિ માસ્ક, સોશિયલ ડિસ્ટન્સ સહિતના નિયમો ભુલાઇ ગયા હતાં. બીજી તરફ વિજય સરઘસ વેળાએ કોવિડ-૧૯ને લગતાં નિયમોનું સખ્ત પાલન કરવાનું રહેશે અને પોલીસ આ નિયમોનું પાલન કરાવશે તેવું પોલીસ કમિશનરશ્રી મનોજ અગ્રવાલે જણાવ્યું છે.

કોવિડ-૧૯ અંતર્ગત સરકારની માર્ગદર્શિકા અનુસાર મહાનગર પાલિકાની ચુંટણીમાં વિજેતા થનાર પક્ષ, ઉમેદવારો દ્વારા વિજય સરઘસ કાઢવામાં આવતું હોય છે. આ વખતે કોરોનાની મહામારીનો ખતરો હજુ પણ મંડરાઇ રહ્યો હોઇ વિજય સરઘસ યોજવા દેવા કે કેમ? તે અંગે અસમજસ ઉભી થઇ હતી. દરમિયાન શહેર પોલીસ કમિશનરશ્રી મનોજ અગ્રવાલે જણાવ્યું હતું કે કોવિડ-૧૯ના તમામ નિયમોનું પાલન કરીને વિજય સરઘસ યોજવાની મંજુરી આપવામાં આવશે. માસ્ક, સોશિયલ ડિસ્ટન્સ સહિતના નિયમો ધ્યાને રાખવાના રહેશે.

જો કે બીજી તરફ ઠેકઠેકાણે અલગ અલગ વોર્ડમાંથી વિજય સરઘસ નીકળી ગયા હતાં. ઉમેદવારો વિશાળ ટેકેદારો-કાર્યકરો સાથે ખુલ્લી જીપો સહિતના વાહનોમાં વિજયોત્સવ મનાવવા નીકળી ગયા હતાં. ફટાકડા પણ ફોડવામાં આવ્યા હતાં. કોરોનાની માર્ગદર્શિકાની અહિ જાણે કોઇને ખબર ન હોય તેવા દ્રશ્યો ઉભા થયા હતાં. મોટા ભાગના વિજેતા ઉમેદવારો અને સાથેના કાર્યકરો-આગેવાનોએ માસ્ક પહેર્યા નહોતા અને સોશિયલ ડિસ્ટન્સનો પણ ભંગ થતો જોવા મળ્યો હતો. તેવી લોકોમાં ફરિયાદો ઉઠી હતી.

(1:02 pm IST)
  • પોપ્યુલર એપ્પનાં 300 કરોડ યુઝર્સના પાસવર્ડ થયા લીક : Gmail, Netflix અને Linkedin પર એકાઉન્ટ રાખતા યુઝર્સને મોટો ઝટકો :લીક થયેલા ડેટામાં યુઝર્સની આઈડી અને પાસવર્ડ જેવી જાણકારી સામેલ :હેવાલ મુજબ 1અંદાજે 500 કરોડ એકાઉન્ટને ટાર્ગેટ કરાયા હતા જેમાંથી 300 કરોડ યુઝર્સના આઈડી અને પાસવર્ડ હૈક કરાયા access_time 11:15 pm IST

  • મધ્યપ્રદેશમાં પણ કોરોનાના કહેરનો ખતરો : મહારાષ્ટ્ર બોર્ડરના જિલ્લામાં એલર્ટ : આરોગ્યમંત્રીએ જિલ્લા ક્રાઈસીસ મેનેજમેન્ટ ગ્રુપ સાથે બેઠક કરી :કોરોના ગાઈડલાઇનનું ચુસ્ત પાલન કરાવવા આદેશ : મહારાષ્ટ્રથી આવનાર પ્રવાસીઓને થર્મલ સ્ક્રીનિંગ કરાશે : મોટા મેળાવડા સહિતના આયોજન પર રોક લગાવાઈ access_time 11:20 pm IST

  • ૪ કોર્પોરેશનના તમામ પરિણામો જાહેર : (૧) રાજકોટ : ૭૨માંથી ૬૮ ભાજપ, ૪ કોંગ્રેસ (૨) જામનગર : ૬૪માંથી ૫૦ ભાજપ, ૧૧ કોંગ્રેસ, ૩ બસપા (૩) ભાવનગર : ૫૨માંથી ૪૪ ભાજપ, ૮ કોંગ્રેસ (૪) વડોદરા : ૭૬માંથી ૬૬ ભાજપ, ૧૦ કોંગ્રેસ : અમદાવાદ - સુરતની કેટલીક બેઠકોની ગણત્રી ચાલુ છે ત્યારે અમદાવાદમાં ૧૯૨માં ૧૩૯ બેઠકો ભાજપ મેળવે છે, કોંગ્રેસ ૧૫ અને ૧ અન્ય પક્ષને, મોડે સુધી ગણત્રી ચાલશે. જયારે સુરતમાં ૧૨૦ બેઠકમાંથી ૯૩ બેઠક ભાજપ મેળવી રહ્યું છે (૫૫ જાહેર થઈ), ૨૫ બેઠક ઉપર આપનો વિજય, ૨ ઉપર આપ આગળ છે, કોંગ્રેસને એક પણ મળી નથી. access_time 4:57 pm IST