Gujarati News

Gujarati News

News of Monday, 4th June 2018

ભકિતનગર અને બી-ડિવીઝન પોલીસે ૭૨ હજારના દારૂ સાથે ત્રણને પકડ્યાઃ એક શખ્સનું નામ ખુલ્યું

ગોવિંદનગરમાંથી ૪૩૨૦૦નો દારૂ ભરેલી રિક્ષા જપ્ત થઇ અને મોરબી રોડ ડેલામાંથી ૨૮૮૦૦નો દારૂ મળ્યો

રાજકોટઃ ભકિતનગર પોલીસે રૂ. ૪૩૨૦૦નો દારૂ ભરેલી રિક્ષા સાથે બે શખ્સને પકડ્યા હતાં. જ્યારે બી-ડિવીઝન  પોલીસે એક ડેલામાં દરોડો પાડી ૨૮૮૦૦ના દારૂ સાથે એકને પકડ્યો હતો. આ દારૂ જેનો હતો તેનું નામ ખુલતાં તેની શોધખોળ થઇ રહી છે.

ભકિતનગર પોલીસે ગોવિંદનગર મેઇન રોડ પરથી સીએનજી રિક્ષા જીજે૩ડબલ્યુ-૪૬૭૫ અટકાવી તલાશી લેતાં રૂ. ૪૩૨૦૦નો ૧૦૮ બોટલ દારૂ મળતાં તે તથા રિક્ષા મળી રૂ. ૭૩૨૦૦નો મુદ્દામાલ કબ્જે કરી નયન જગદીશભાઇ વાઢેર (રહે. રણુજા મંદિર પાસે શ્યામ પાર્ક-૩) અને જય કિરણભાઇ ચાવડા (રહે. જંગલેશ્વર આરએમસી કવાર્ટર)ની ધરપકડ કરી હતી. પી.આઇ. બી. પી. સોનારાની રાહબરીમાં પીએસઆઇ પી.એમ. ધાખડા, એન. એ. શુકલ, એએસઆઇ જયદિપસિંહ રાણા, કોન્સ. અજયભાઇ ચોૈહાણ, સુર્યકાંતભાઇ પરમાર, રામદેવસિંહ જાડેજા, મયુરસિંહ પરમાર, ભુપેન્દ્રસિંહ વાઘેલા અને અક્ષયરાજસિંહ રાણા પેટ્રોલીંગમાં હતાં ત્યારે આ કાર્યવાહી થઇ હતી.

જ્યારે બી-ડિવીઝન પોલીસે મોરબી રોડ પર દ્વારકાધીશ નામના ડેલામાં રહેતાં મુળ અમદાવાદ વાડજના રાજુ ખુશાલજીભાઇ સોલંકી (ઉ.૩૨)ને રૂ. ૨૮૮૦૦ના ૯૬ બોટલ દારૂ સાથે પકડી લીધો હતો. આ શખ્સ આ ડેલામાં ચોકીદારી કરે છે. દારૂ ચુનારાવાડના જીતેન્દ્ર ઉર્ફ જીતુ રમેશભાઇ ગોહેલે ઉતાર્યો હોવાનું ખુલતાં તેની શોધખોળ થઇ રહી છે. પી.આઇ. આર. એસ. ઠાકરની રાહબરીમાં પીએસઆઇ આર. એસ. પટેલ, એએસઆઇ મહેશગીરી ગોસ્વામી, હેડકોન્સ. વીરમભાઇ જે. ધગલ, હિતુભા એચ. ઝાલા, એભલભાઇ બરાલીયા, અજીતભાઇ લોખીલ, મહેશભાઇ ચાવડા, કિરણભાઇ પરમાર, મનોજભાઇ મકવાણા સહિતનો સ્ટાફ પેટ્રોલીંગમાં હતો ત્યારે અજીતભાઇ અને મહેશભાઇની બાતમી પરથી દરોડો પાડવામાં આવ્યો હતો.

(4:16 pm IST)