Gujarati News

Gujarati News

News of Monday, 16th April 2018

લાંચ કેસમાં સાતડા દૂધ મંડળીના મંત્રીએ એસીબીમાં રાજકોટ ડેરીનો બોગસ ઓફિસ ઓર્ડર રજૂ કર્યો !

સંઘના બનાવટી લેટરપેડ ઉભુ કરી અધ્યક્ષની સહી કરી નાખીઃ ડેરીના ચેરમેન ગોવિંદભાઈ રાણપરીયાની પોલીસ કમિશ્નરને અરજી

રાજકોટ, તા. ૧૬ :. રાજકોટ જિલ્લા સહકારી દૂધ ઉત્પાદક સહકારી સંઘ (રાજકોટ ડેરી)ના કથીત લાંચ પ્રકરણમાં ડેરીના કેમીસ્ટ સાજન ગધેથરીયા સામે નોંધાયેલ કેસમાં રાજકોટ જિલ્લા દુધ ઉત્પાદક સંઘના બનાવટી લેટરપેડ ઉપર બોગસ ઓફિસ ઓર્ડર ટપાલ મારફત રજૂ થયાની ફરીયાદ નોંધાયેલ. આ ગંભીર પ્રકરણની તપાસ કરી રાજકોટ ડેરીના નામે બોગસ ઓર્ડર રજુ કરનાર તત્વો સામે ફોજદારી ગુન્હો દાખલ કરી પગલા ભરવા માટે રાજકોટ જિલ્લા સહકારી દૂધ ઉત્પાદક સહકારી સંઘના ચેરમેન ગોવિંદભાઈ શામજીભાઈ રાણપરીયાએ પોલીસ કમિશનરને લેખીત રજૂઆત કરી છે.

આ મામલે રાજકોટ ડેરીના ચેરમેન ગોવિંદભાઈ રાણપરીયાએ પોલીસ કમિશનરને કરેલી અરજીમાં જણાવ્યુ છે કે, કથિત લાંચ કેસમાં એન્ટીકરપ્શન બ્યુરોના તપાસનીસ અધિકારી સમક્ષ સાતડા દૂધ ઉત્પાદક સહકારી મંડળીને ઉદેશીને રાજકોટ જિલ્લા દૂધ ઉત્પાદક સંઘ લી.ના બોગસ લેટરપેડ ઉપર તા. ૨૨-૩-૨૦૧૮ના રોજ રાજકોટ ડેરીના મેનેજીંગ ડીરેકટરને ઉદેશીને અધ્યક્ષે લખેલો બોગસ ઓફિસ ઓર્ડર રજુ કરેલ છે.

હકીકતે એ.સી.બી. પોલીસ ઈન્સ્પેકટર સમક્ષ રજુ થયેલો તા. ૨૨-૩-૧૮નો ઓફિસ ઓર્ડર સંપૂર્ણ બોગસ અને બનાવટી છે આવો કોઈ પત્ર રાજકોટ ડેરીમાંથી સાતડા મહિલા દૂધ ઉત્પાદક મંડળીને મોકલાવેલ નથી, ઓફિસ ઓર્ડરમાં દર્શાવેલ લેટરપેડ રાજકોટ જિલ્લા દૂધ ઉત્પાદક સંઘ લી.ના નામનું બોગસ અને બનાવટી ઉભુ કરેલ છે અથવા તો ઝેરોક્ષમાંથી બનાવેલ હોય તેવુ લાગે છે તેમજ જિલ્લા સહકારી દૂધ ઉત્પાદક સંઘના અધિકૃત આઉટવર્ડ નંબર પણ નથી લેટરમાં જે ગુજરાતી ફોન્ટ (અક્ષર)નો ઉપયોગ થયેલ છે તે કચેરીના ઉપયોગમાં લેવાતા નથી. આ ઉપરાંત પત્રમાં દર્શાવેલ કાર્યપ્રણાલી પણ રાજકોટ ડેરીમાં નથી.

આ પત્રમાં ઓફિસ ઓર્ડરનો શબ્દપ્રયોગ થયેલ છે જોતા સંઘની કાર્યપ્રણાલી મુજબ ઓફિસ ઓર્ડર મેનેજીંગ ડીરેકટરની સહીથી નીકળતા હોય છે જ્યારે આ ઓર્ડરમાં અધ્યક્ષની સહી કરવામાં આવી છે અને તે પણ બોગસ સહી હોય અથવા તો સ્કેન કરેલ હોવાનું જણાય છે. આમ એન્ટીકરપ્શન બ્યુરોમાં સાતડા મહિલા દૂધ મંડળીના મંત્રીએ બોગસ ઓફિસ ઓર્ડર રજુ કર ગુનાહીત કૃત્ય કર્યાનું સ્પષ્ટ ફલીત થાય છે.

આ કેસમાં આરોપી પાસેથી બોગસ ઓફિસ ઓર્ડરની ઓરીજનલ કોપી કબ્જે કરી તેના લેટરપેડ, ગુજરાતી ફોન્ટ, સહી વિગેરે બોગસ હોય આવુ બોગસ સાહિત્ય રજુ કરી તપાસ ગેરમાર્ગે દોરવાનું કાવત્રુ રચનાર તેમજ તેને સહયોગ કરનાર તમામ વ્યકિતઓ સામે ગુનો દાખલ કરવા રાજકોટ ડેરીના ચેરમેન ગોવિંદભાઈ રાણપરીયાએ પોલીસ કમિશનર  સમક્ષ ફરીયાદ કરી છે.(૨-૧૨)

(1:57 pm IST)