Gujarati News

રાજકોટ, તા. ૧૯ :. જિલ્લા પંચાયતમાં કોંગ્રેસના બે જુથો વચ્ચે લાંબા સમયથી ચાલતી લડાઈમાં એક તરફ સમાધાનની વાત થઈ રહી છે. બીજી તરફ સુપરસીડ માટેની હીલચાલ ચાલી રહી છે. પંચાયતના કોંગ્રેસના બાગીઓએ ટુંક સમયમાં સમાધાન ન થાય તો પંચાયતની ચૂંટાયેલી પાંખનું વિસર્જન કરી નવેસરથી ચૂંટણીની માંગણી કરવા માટેની તૈયારી કરી લીધાનું જાણવા મળે છે. આ પ્રકારની હીલચાલ સમાધાનનું દબાણ વધારવા માટેનો પ્રયાસ હોઈ શકે છે. જો કે આવી વિધિવત માંગણી થાય તો ભાજપ સરકાર તેના સ્વાગત માટે તૈયાર હોવાના નિર્દેશ છે. ભવિષ્યમાં જરૂર પડયે ચૂંટાયેલી પાંખને ઘર ભેગી કરવા માટે સરકાર કક્ષાએ વહીવટી દ્રષ્ટિએ પૂર્વ તૈયારી ચાલી રહ્યાનું ચર્ચાય રહ્યુ છે.

રાજકીય વિખવાદ અને એકથી વધુ મુદ્દાઓ પર કાનૂની લડાઈના કારણે પંચાયતના વહીવટ પર માઠી અસર પડી છે. સરકાર જુદા જુદા મુદ્દાઓનું એકત્રીકરણ કરી જિલ્લા પંચાયતના વહીવટી તંત્ર પાસેથી સત્તાવાર અહેવાલ માંગી સુપરસીડની દિશામાં આગળ વધી શકે છે. જો પંચાયતનો વહીવટ સારી રીતે ચાલી શકે તેમ ન હોય તો ખુદ બાગીઓ જ સુપરસીડની લેખિત માંગણી કરવા તૈયાર છે. ભાજપના બે અને બાગીઓ મળી આજની સ્થિતિએ સંખ્યાબળ ૧૪ સભ્યોનું છે. સમાધાનની શકયતા નષ્ટ થઈ ગઈ નથી. પંચાયતના પ્રમુખ-ઉપપ્રમુખ અને કારોબારી અધ્યક્ષ રાજીનામુ આપી દયે અને ત્યાર બાદ નવેસરથી પદાધિકારીઓની પસંદગી થાય તેવી ફોર્મ્યુલા બાગી જુથે મુકી છે. સામેના કોંગી જુથે તેનો સ્પષ્ટ પ્રતિભાવ આપ્યો નથી. ભાજપની ઈચ્છા જગજાહેર છે. જો વિસર્જન થાય તો નવી ચૂંટણી બાકીની મુદત માટે જ આવી શકે. પંચાયત સુપરસીડ માટે દિમાગથી વિચારનારા સભ્યો દિલથી વિસર્જન ઈચ્છતા નથી. પંચાયતમાં રાજકીય અને વહીવટી દ્રષ્ટિએ ટુંક સમયમાં નવો વળાંક આવે તેવી પ્રબળ શકયતા છે.