Gujarati News

રાજકોટઃ રાજકોટ પોલીસ કમિશનરેટ વિસ્તારના હિસ્ટ્રીશીટર, ટપોરી, બૂટલેગર સહિતના ગુનેગારોની માહિતી પોલીસને ફિંગરટીપ ઉપર મોબાઇલમાં સરળતાથી મળતી કરવામાં ઉપયોગી રાજકોટ પોલીસની સુરક્ષા કવચ એપ્લીકેશનને પોલીસ એકસીલેન્સ એવોર્ડ-૨૦૧૯થી નવાજવામાં આવી છે. ઇન્ટરનેશનલ પોલીસ એકસ્પોમાં આ એવોર્ડ પોલીસ કમિશનર મનોજ અગ્રવાલે સ્વીકાર્યો હતો.

આ એપ્લીકેશનના ઉપયોગથી મિલ્કત સંબંધી ગુનાઓ અને શરીર સંબંધી ગુનાઓમાં   સંડોવાયેલા માથાભારે શખ્સો અને ચોર-ચપાટીયાઓને ઝડપી લેવામાં મહત્વની સફળતા મળી છે.

'આંતરરાષ્ટ્રીય પોલીસ એકસ્પો' એ એવું પ્લેટફોર્મ છે જેમાં જુદા-જુદા દેશની પોલીસ અને આર્મ્ડ ફોર્સના પ્રતિનિધિઓ તેમના ક્ષેત્રમાં થયેલા સંશોધનો, ટેકનોલોજીના સુધારાઓ અને આધુનિક સાધન સામગ્રી વિશે માહિતીની આપ-લે કરે છે.

સુરક્ષા કવચ એપ્લીકેશનની મદદથી લિસ્ટેડ ગુનેગારોને સતત પોલીસ તપાસતી રહેતી હોવાથી પાછલા વર્ષોની સરખામણીએ ઘરફોડ ચોરીના અને શરીર સંબંધી ગુનાઓમાં ઘટાડો નોંધાયો છે. લોકસભાની ચૂંટણી દરમિયાન પણ આ એપ્લીકેશનનો આરોપીઓને ચકાસવા ભરપુર ઉપયોગ કરવામાં આવ્યો હતો. ગુજરાતમાં રાજકોટ પોલીસને સોૈ પ્રથમ ટેકનિકલ ક્ષેત્રનો આ એવોર્ડ મળ્યો છે.