Gujarati News

રાજકોટ તા. ૧૯ : કોરોના કાળમાં અનેક હસતી રમતી જીંદગીઓ અસ્‍તવ્‍યસ્‍ત થઇ ગઇ છે. આવુ જ કઇક બિમલ દોશીના પરિવાર સાથે થયુ છે. હસમુખા, તરવરીયા, મહેનતુ આ યુવાન તેમના ૮૦ વર્ષીય વૃધ્‍ધ માતા-પિતા, પત્‍નિ અને ૧૪ વર્ષીય પુત્ર સાથે આનંદ કિલ્લોલ ભર્યુ જીવન વિતાવી રહ્યો હતો. ત્‍યાં અચાનક ઓકટોબર ૨૦૨૦ માં કોરોનાએ દેખા દીધા. પરિવારની જીવાદોરી સંભાળતા ખુદ બિમલભાઇ હોસ્‍પિટલમાં દાખલ થયા. પણ બિમલભાઇ અને તેમનું આખુ કુટુંબ હિમ્‍મતભેર કોરોના સામે ઝઝુમીયા. કોરોનામાંથી હેમખેમ બહાર પણ આવી ગયા. પણ આ ખુશી કુદરતને મંજુર ન હોય તેમ વધુ એક કસોટીમાં મુકી દીધા. બિમલભાઇને મ્‍યુકર માઇકોસીસની બિમારી લાગુ પડી. તબીબોના ભરપુર પ્રયત્‍નો છતા મ્‍યુકર માઇકોસીસ પ્રસરીને મગના હાડકા સુધી પહોંચી ગયો. એક તો કોરોના સામે લડવામાં બિમલભાઇનો પરિવાર ખર્ચાઇ ચુકયો હતો. ત્‍યાં આ વધુ બિમારીએ રહીસહી બચેલ રકમ પણ ખર્ચાવી નાખી. જોખમી શષાક્રિયાઓ સહતા બિમલભાઇની મદદે સગા સંબંધી, મિત્રો આવ્‍યા. બહેનોએ આણાના દાગીના વહેંચીને પણ સારવાર ચાલુ રખાવી. જીવન મરણ વચ્‍ચે ઝોલા ખાતા બિમલભાઇ માટે એક આશાનું કિરણ એ છે કે બિમલભાઇના મગજના તળીયે રહેલુ મ્‍યુકર માઇક્રોસીસના ચેપ વાળુ પોલુ થઇ ગયેલુ હાડકુ ન્‍યુરો સર્જરીથી દુર કરવામાં આવે. તેના સ્‍થાને બીજી સર્જરીની મદદથી મગજને આધાર માટે તે હાડકાની જગ્‍યાએ ટીટાનીયમનો સળીયો ઇમ્‍પ્‍લાન્‍ટ કરવામાં આવે. તો જરૂર તેમને સારૂ થઇ શકે. આ માટે રૂ.૧૭.૫ લાખ (સાડા સત્તર લાખ) જેવો ખર્ચો થઇ શકે તેમ હોવાનો અભિપ્રાય તબીબોએ આપેલ છે. ત્‍યારે અત્‍યાર સુધીમાં ખર્ચામાં સાફ થઇ ગયેલ આ પરિવારને આગળની સારવાર માટે આર્થિક મદદની જરૂર છે. ટીપે ટીપે સરોવર ભરાય. તેમ જો યથા શક્‍તિ સૌકોઇ મદદ કરે તો કદાચ બિમલભાઇના જીવનમાં ફરી ખુશી લહેરાઇ શકે. બીમલભાઇ કે. દોશીના નામથી આઇસીઆઇસીઆઇ બેન્‍ક, કાલાવડરોડ શાખા, રાજકોટ ખાતે સેવીંગ એકાઉન્‍ટ ધરાવે છે. તેમના ખાતા નં. ૬૨૪૮ ૦૧૫૨ ૧૨૪૬ છે. આઇએફસી કોડ :  ICIC0006248 છે. ઉદાર હાથે દાનની સરવાણી વહાવવા અપીલ કરાઇ છે.