Gujarati News

રાજકોટ તા. ૧૯: સંત કબીર રોડ પર કનકનગર-૬માં રહેતાં અને નવાગામ રંગીલા સોસાયટીમાં બંગડીનું કારખાનુ ધરાવતાં ભરત ઉર્ફ બંગડી સવજીભાઇ સોરાણી (કોળી) (ઉ.૨૮)ને તે સાંજે સાડા પાંચેક વાગ્યે નવાગામમાં પોતાના કારખાનાના દરવાજા અગાઉ બળી ગયા હોઇ તે બદલાવવા માટે જતાં ત્યાં જ રહેતાં સંજય ઉર્ફ ટકો રોજાસરા નામના કોળી શખ્સે આવી ઝઘડો કરી છરીથી હુમલો કરી ગાલ પાસે ઇજા કરતાં સારવાર માટે દાખલ થયો છે.

કુવાડવાના પી.એસ.આઇ. આર. એલ. ખટાણા અને કે. સી. સોઢાએ ભરત ઉર્ફ બંગડીની ફરિયાદ પરથી સંજય સામે ગુનો નોંધ્યો છે. આ શખ્સ અગાઉ પણ મારામારીમાં સંડોવાઇ ચુકયો છે. ભરતના કહેવા મુજબ જન્માષ્ટમીના તહેવાર પર વાહન સામ-સામે આવી જવાના મુદ્દે બોલાચાલી થતાં તે વખતે સંજય ઉર્ફ ટકાએ મારા કારખાનાના દરવાજા સળગાવી નાંખ્યા હતાં. મેં ત્યારે કોઇ ફરિયાદ કરી નહોતી. આ દરવાજા રિપેર કરાવવા હું ગત સાંજે કારખાને ગયો ત્યારે ટકાએ જુના મનદુઃખને કારણે છરીથી હુમલો કરી દીધો હતો.