Gujarati News

Gujarati News

News of Thursday, 17th May 2018

પંચાયતના કામમાં ઠાગાઠૈયા, તલાટીઓની ગેરહાજરી, ગ્રાન્ટ વાપરવામાં વિસંગતતા વગેરે મુદ્ે બોર્ડમાં તડાપીટ

જિલ્લા પંચાયતની સામાન્ય સભામાં સભ્યોનો રાબેતા મુજબનો અસંતોષ, વહીવટી તંત્રનું એ જ આશ્વાસન : 'મલાઇવાળી' ફાઇલો કેમ ઉપર આવી જાય છે ? સામાન્ય સભામાં સભ્યના ખૂલ્લા આક્ષેપથી સન્નાટો

વેદના ને વાચા :.. જિલ્લા પંચાયતની સામાન્ય સભામાં મંચ પર પ્રમુખ નિલેષ વિરાણી, ઉપપ્રમુખ અવસરભાઇ નાકિયા, કારોબારી ચેરમેન અર્જુન ખાટરિયા, ધારાસભ્ય કુંવરજીભાઇ બાવળિયા, ડી. ડી. ઓ. અનિલકુમાર રાણાવાસિયા, ડે. ડી. ડી. ઓ. ધીરેન મકવાણા, જિલ્લા કોંગ્રેસ પ્રમુખ હિતેષ વોરા, વગેરે ઉપસ્થિત રહ્યા હતાં. તે પ્રસંગની તસ્વીર. (તસ્વીર : સંદીપ બગથરીયા)

રાજકોટ તા. ૧૭ જિલ્લા પંચાયતની સામાન્ય સભા આજે પ્રમુખ નિલેષ વિરાણીની અધ્યક્ષતામાં મળેલ જેમાં ગ્રામીણ હેડ કવાર્ટરમાં મોટાભાગના તલાટીઓની ગેરહાજરી, રેતી-કપચીની ગ્રાન્ટ વાપરવામાં  સરકારી નડતર, સભ્યોએ સૂચવેલા કામો અને ફરીયાદોના નિકાલમાં તંત્રના ઠાગાઠૈયા વગેરે બાબતે સભ્યોએ તડાપીટ બોલાવી હતી.

સામાન્ય સભામાં ચંદુભાઇ શીંગાળા, મગનભાઇ મેટાળિયા, કે. પી. પાદરિયા, મનોજ બાલધા, વજીબેન સાંકળીયા, હંસાબેન ભોજાણી, હેતલબેન ગોહેલ, ધુપદબા જાડેજા, ભાવનાબેન ભૂત વગેરેએ ભાગ લીધેલ. સભાના પ્રારંભે નવા ડી. ડી. ઓ. અનિલકુમાર રાણાવાસિયાનું સ્વાગત કરવામાં આવેલ. ડી. ડી. ઓ.ના પી. એ. કાંતિભાઇ ભાલોડીયા નિવૃત થઇ રહ્યા હોવાથી તેમને નિવૃતિ વિદાયમાન અપાયું હતું.

ચંદુભાઇએ મહાનગરપાલિકાની સરખામણીએ પંચાયતની સામાન્ય સભાની કાર્યવાહી ઘણી શિસ્તપૂર્ણ ચાલતી હોવાનું ગૌરવ વ્યકત કરી  જણાવેલ કે આપણી સભા વખતે કદી પોલીસ બોલાવી પડી નથી. તેમણે સભ્યોના લેખિત જવાબ સભાના ત્રણ દિવસ અગાઉ આપવાનો આગ્રહ રાખ્યો હતો.

કિશોરભાઇ પાદરિયાએ મંડલીકપુર ગામમાં ગૌચરમાં દબાણ કરી ગ્રામ પંચાયતે બાર લાખ રૂ. જેવો ભ્રષ્ટાચાર કર્યાનો આક્ષેપ કરી તપાસ બાબતે પ્રશ્ન ઉઠાવેલ એક તબકકે તો તેઓ બોલી ઉઠેલ કે 'મલાઇવાળી ફાઇલો કેમ ઉપર આવી જાય છે ? અને બાકીની કેમ પડતર રહે છે.'

ભાદર - છાપરવાડી નદીમાં આવતા લાલ પાણી અને રજૂઆત છતા તેનો ઉકેલ ન આવવા બાબતે આક્રોશ વ્યકત કરી જણાવેલ કે આ પાણીને પીવા લાયક ગણતા હોય તો પદાધિકારીઓ અને અધિકારીઓ સ્થળ પર આવીને એક-એક લીટર લાલ પાણી પી બતાવે...!

રેતી-કપચીની ગ્રાન્ટમાંથી અન્ય જિલ્લા પંચાયતો જે વિકાસ કામો કરી શકે તે રાજકોટ જિલ્લા પંચાયત શા માટે ન કરી શકે તેવો સવાલ અમૂક સભ્યોએ ઉઠાવતા ડી. ડી. ઓ. એ અન્ય પંચાયતોમાંથી માહિતી મેળવવાનું આશ્વાસન આપ્યું હતું. કારોબારી અધ્યક્ષ અર્જુન ખાટરિયાએ ભાજપ સરકાર કોંગી શાસિત રાજકોટ જિલ્લા પંચાયત પ્રત્યે કિન્નાખોરી રાખતી હોવાનો આક્રોશ વ્યકત કર્યો હતો.

પ્રમુખે જે સભ્યોની ગ્રાન્ટ કામ ન સૂચવવાના કારણે જતી રહી હોય તેને વધારાની ગ્રાન્ટ હવે પછી આપવાનું વચન આપ્યુ હતું.

એક સભ્યએ તલાટીઓ ગામમાં અનિયમિત હોવાની ફરીયાદ કરતા ડી. ડી. ઓ. એ સમયાંતરે તપાસ કરી પગલા લેવાની ખાતરી આપી હતી.

શંકાસ્પદ શૈક્ષણીક પ્રમાણપત્રથી આરોગ્ય કાર્યકર તરીકે નોકરી મેળવવાના પ્રકરણની તપાસ ચાલુ હોવાનું ડી. ડી. ઓ. એ જણાવ્યું હતું.

ડી. ડી. ઓ.એ સભ્યના પતિને બેસાડી દીધા

રાજકોટ : જિલ્લા પંચાયતની સામાન્ય સભામાં મહિલા સભ્યએ પૂછેલ પ્રશ્નની ચર્ચા કરવા તેના પતિ ઉભા થતા ડી. ડી. ઓ. એ તેમને બેસાડી દઇ જેનો પ્રશ્ન હોય તે જ ચર્ચા કરે તેમ ટકોર કરી હતી.

(4:34 pm IST)
  • આગામી દાયકામાં દિલ્હી વિશ્વનું સૌથી વધુ વસ્તીવાળું શહેર બનશે :2050 સુધીમાં દુનિયામાં શહેરી વસ્તીમાં ભારતનું સૌથી વધુ યોગદાન હશે :હાલમાં વિશ્વની 55 ટકા શહેરી વસ્તી 2050માં વધીને 68 ટકા લોકો શહેરોમાં વસવાટ કરતા હશે :સંયુક્ત રાષ્ટ્રનો અંદાજ access_time 11:15 pm IST

  • કર્ણાટકના કોંગ્રેસના એક ધારાસભ્ય રીસોર્ટમાંથી બહાર નીકળતા રાજકીય ગરમાવો : હોર્સ ટ્રેડીંગથી બચવા કોંગ્રેસે તેના ધારાસભ્યોને ઈગલટન રીસોર્ટમાં રાખ્યા હતા : જયાંથી ધારાસભ્ય રાજશેખર પાટીલ ખરાબ તબિયતનું કારણ આપી બહાર નીકળી જતાં કર્ણાટકના રાજકારણમાં ગરમાવો આવી ગયો છે access_time 6:10 pm IST

  • પાકિસ્તાનના પૂર્વ વડાપ્રધાન નવાઝ શરીફને રાહત :રાજદ્રોહનો કેસ ચલાવવાની માંગણી કરતી અરજી લાહોર હાઇકોર્ટે ફગાવી :નવાઝે એક ઇન્ટરવ્યૂમાં મુંબઈ હુમલામાં પાકિસ્તાની આતંકીઓનો હાથ હોવાનું કહેતા તેના વિરુદ્ધ રાજદ્રોહનો કેસ કરવા અરજી કરાઈ હતી :નવાઝ વિરુદ્ધ આ અરજી પાકિસ્તાન ઝિંદાબાદના મુખ્યા અને વકીલ આફતાબ વિર્કે કરી હતી :લાહોર હાઇકોર્ટે કહ્યું કે અરજીકર્તાએ ઉચિત ફોરમ પાસે જવું જોઈએ access_time 1:08 am IST