Gujarati News

રાજકોટઃ પશ્ચિમ રેલ્વેના રાજકોટ ડીવીઝનમાં દર વર્ષે રમાતી ઇન્ટર સેકશન ક્રિકેટ ટુર્નામેન્ટ 'ડીઆરએમ ટ્રોફી ર૦૧૯-ર૦' નું આયોજન આ વખતે પણ તા.૧૧ થી ૧પ, ૩ દિવસ દરમિયાન રાજકોટના કોઠી કંમ્પાઉન્ડ સ્થિત રેલ્વે સ્ટેડીયમ ઉપર કરવામાં આવ્યું હતું. જેમાં રેલ્વે સુરક્ષાબળ (આરપીએફ)ની ટીમ ચેમ્પીયન થઇ હતી. આ ટુર્નામેન્ટમાં કોમર્શીયલ, મીકેનીકલ, એન્જીનીયરીંગ, ઓપરેટીંગ, સીંગ્નલ, એસ્ટાબ્લીસ્ટમેન્ટ, આરપીએફ અને ઇલેકટ્રીકલ વિભાગની કુલ ૮ ટીમોએ ભાગ લીધો હતો. જેમાં ૧પ મેચો રમાયા હતા. ફાઇનલ મેચ આરપીએફ અને એન્જીનીયરીંગ વિભાગની ટીમો વચ્ચે રમાયો હતો જેમાં પહેલા બેટીંગ કરતા આરપીએફની ટીમે ૧પ ઓવરમાં ૪ વિકેટના નુકશાન ઉપર ૧૩૦ રન બનાવ્યા હતા.જેના જવાબમાં એન્જીનીયરીંગની ટીમ ૮ વિકેટ ગુમાવી ૧૦૮ રન જ બનાવી શકી હતી. ટુર્નામેન્ટમાં હરેશ માવલાને ફાઇનલ મેચના મેન ઓફ ધી મેચ સાથે મેન ઓફ ધી સીરીઝનો એવોર્ડ આપવામાં આવ્યો હતો. બેસ્ટ બેસ્ટમેન મેરૂ મકવાણા અને બેસ્ટ બોલર દીપક મરીચ જાહેર થયા હતા. વિજેતા ટીમને અને રનર્સ અપ ટીમને ડીઆરએમ પરમેશ્વર ફુંકવાલ દ્વારા ઇનામો આપવામાં આવ્યા હતા. ઇનામ વિતરણ સમારંભમાં ડીસીએમ રવિન્દ્ર જૈન રાજકોટ રેલ્વે સંઘના સેક્રેટરી શ્રી અભિનવ જૈફ સહીતના અધિકારીઓ ઉપસ્થિત રહયા હતા. ટુર્નામેન્ટને સફળ બનાવવામાં પુર્વ રણજી ટ્રોફી ખેલાડી સેન્ડીલ નટકન, હર્ષદ જોષી, ફિરોઝ બાંભણીયા, પ્રતિક મહેતા અને સંદીપ (જોલી) જોબનપુત્રાએ જહેમત ઉઠાવી હતી.