Gujarati News

Gujarati News

News of Wednesday, 14th November 2018

સિવિલ હોસ્પિટલની ઓપીડીમાં 'ટોકન' સિસ્ટમમાં ખોટકોઃ દર્દીઓ અને તેના સગાઓ થયા ભારે હેરાન

સર્વરમાં ખામી સર્જાતા કલાકો સુધી લાઇનમાં ઉભા રહેવા છતાં ટોકન ન મળ્યાઃ ભારે દેકારોઃ સત્તાધીશો કાયમ ઉભી થતી આ સમસ્યાનો નિવેડો લાવે તેવી લાગણી અને માંગણી

રાજકોટઃ શહેરની સિવિલ હોસ્પિટલમાં માત્ર શહેરના જ નહિ સોૈરાષ્ટ્ર અને કચ્છમાંથી પણ દર્દીઓ આવે છે. અહિ દર્દીઓને તમામ પ્રકારની સુવિધા મળી રહે એ માટેના પ્રયત્નો થતાં હોય છે. પરંતુ ઘણી વખત દર્દીઓ અમુક સિસ્ટમને કારણે પારાવાર પરેશાન થઇ જતાં હોય છે. આવી જ એક સિસ્ટમ ટોકનની છે. આમ તો આ સુવિધા દર્દીઓના લાભાર્થે શરૂ કરવામાં આવી છે. પરંતુ આ સિસ્ટમ લાભદાયક કરતાં પીડાદાયક વધુ બની ગઇ છે. અવાર-નવાર ટોકન સિસ્ટમમાં ખોટકો સર્જાય છે અને તેના કારણે એક ટોકન નીકળ્યા પછી બીજા ટોકન મળવામાં પુષ્કળ વિલંબ સર્જાય છે. આજે જ આવું થયું હતું. ટોકનના સર્વરમાં ખામી ઉભી થતાં ટોકન ન મળતાં કલાકો સુધી સેંકડો દર્દીઓ હેરાન પરેશાન થઇ ગયા હતાં. તહેવારો પુરા થયા હોઇ અને પાછો આજે બુધવાર હોઇ દર્દીઓ મોટી સંખ્યામાં ઉમટી પડ્યા હતાં. ત્યારે જ ટોકનની સિસ્ટમ ગોટાળે ચડી જતાં દર્દીઓને કારણ વગર 'પરેશાની રૂપી ઇન્જેકશન'નો ડોઝ મળ્યો હતો. તબિબી અધિક્ષક ડો. મનિષ મહેતા દર્દીઓને જરાપણ મુશ્કેલી ન પડે એ માટે સતત સતર્ક રહે છે અને દોડતા રહે છે. પરંતુ ટોકન સિસ્ટમ જ્યારથી ચાલુ થઇ છે ત્યારથી અવાર-નવાર તેમાં ખોટકા ઉભા થવાથી દર્દીઓ હેરાન થઇ રહ્યા છે. શ્રી મહેતા આ બાબતે ગંભીરતાથી વિચારી આ સમસ્યાનો કાયમી ધોરણે ઉકેલ લાવે તેવી દર્દીઓ અને તેના સગાઓની લાગણી અને માંગણી છે. આજે સર્વર ખરાબ થઇ જતાં દર્દીઓ ભારે હેરાન થયા હતાં. તસ્વીરમાં સેંકડો દર્દીઓ ટોકન ન મળતાં ઉભેલા જોઇ શકાય છે. મોડા ટોકન મળતાં મોટા ભાગના દર્દીઓ ડોકટરને બતાવી શકયા નહોતા અને ધક્કો થયો હતો. (તસ્વીરઃ સંદિપ બગથરીયા)

(3:40 pm IST)