Gujarati News

રાજકોટઃ વૈશ્વિક મહામારી કોરોનાએ રાજકોટ શહેરમાં હાલમાં ખોૈફનો માહોલ ઉભો કર્યો છે. સંક્રમીત દર્દીઓની સંખ્યા સતત વધી રહી છે અને મૃત્યુ પણ સતત વધી રહ્યા છે. બે દિવસનો મૃત્યુઆંક ૧૧૧ થઇ ગયો છે. આ જોતાં જ એ સ્પષ્ટ થાય છે કે કોરોનાની આ વખતની થપાટ વધુ આકરી છે. સિવિલ હોસ્પિટલનું કોવિડ સેન્ટર તો કેટલાય દિવસથી હાઉસફુલ થઇ ગયું હતું. બીજા વોર્ડ ખાલી કરીને ત્યાં કોવિડ દર્દીઓ માટે વ્યવસ્થા ઉભી કરવામાં આવી એ જગ્યાઓ પણ ભરાઇ ચુકી છે. દરરોજ નવા દર્દીઓની આવક તો ચાલુ જ રહી છે. ચોક્કસપણે આ ભયનો માહોલ ગણી શકાય. પરંતુ તંત્રવાહકો શહેરીજનોને આ ભયના માહોલમાંથી બહાર લાવવા માટે સતત મહેનત કરી રહ્યા છે. લોકોએ ડરવાની જરૂરી નથી, પણ ચેતી જવું એ અત્યંત જરૂરી છે. સિવિલ હોસ્પિટલે આ કતારો જામે છે એનો મતલબ એ છે કે અહિ મોટી સંખ્યામાં દર્દીઓ રોજ આવી રહ્યા છે અને તેમની સારવાર પણ થઇ રહી છે. તંત્ર પોતાની રીતે તૈયાર છે, સંક્રમણને અટકાવવા મથામણ કરી રહ્યું છે. પણ તંત્રને આ સમયે લોકોના સહયોગની પણ અત્યંત જરૂર છે.

તંત્ર કોઇ આર્થિક સહયોગની આશા નથી રાખતું. પરંતુ તમારાથી જે થઇ શકે એટલુ તો કરો. માસ્ક અચુક પહેરો, સોશિયલ ડિસ્ટન્સ રાખો, સેનેટાઇઝર વાપરો. જરૂર ન હોય તો બહાર નીકળવાનું ટાળો, ગીરદીથી હાલના દિવસોમાં દૂર જ રહો. તંત્રવાહકો તો પોતાની રીતે મથી રહ્યા છે સંક્રમણને કાબુમાં લેવા માટે, તમે પોતે જાગૃત બની જાવ એ આજના સમયની માંગ છે. સિવિલ હોસ્પિટલના કોવિડ સેન્ટર ખાતે દરરોજ દર્દીઓની આવક થતી રહે છે. કોવિડ સેન્ટરમાં દાખલ થવા માટે આવતા દર્દીઓને લઇને આવતી ૧૦૮ની અહિ તસ્વીરમાં દેખાય છે એ રીતની કતારો  રોજ જામતી રહે છે. આ તસ્વીર જોઇને, આ કતાર જોઇને પણ ચેતી જવું જરૂરી છે. આપણે સંક્રમિત નથી થયા કે થઇને બહાર નીકળી ગયા છીએ તો પણ સાવચેત રહેવું, સજાગ રહેવું અને બીજાને પણ સજાગ કરવા એ આપણી સોૈની ફરજ બની રહે છે. ડરવા કરતાં જાગૃત રહીએ એ વધુ જરૂર છે. આપણે નિયમોનું પાલન કરીએ અને સાથે એ પ્રાર્થના પણ કરીએ કે અહિ તસ્વીરમાં દેખાય છે એવી કતારમાં પહોંચવાની આપણા કોઇ માટે વેળા આવે નહિ. (ફોટોઃ સંદિપ બગથરીયા-આલેખન ભાવેશ કુકડીયા)